Ass-nni n, 12 deg yennayer 2018, yella-d yiwen n wahil s wazal-is i lmend n usfugel n unsay n Yennayer akken ad ikcem ussegas amaynut 2968 ɣef Yimaziɣen s umata. Anect-a s ddaw leɛnaya n tɣiwant n Ibudraren, agraw n tsekla Tira Tura n At Yanni, tiddukla tadelsant n Iɣil n Wammas d uɣerbaz alemmas n Ibudraren ƐMARA Racid. Ihi di temlilit-a, yella-d usihar n yidlisen n tmaziɣt i d-xedmen yiferdisen n ugraw n tsekla Tira Tura n At Yanni akked temsikent n yiwen n tguri i d-yettmeslayen ɣef Yennayer i d-yexdem umaṭṭaf wis rebɛa n tmaziɣt. Syin yella-d yiwen usarag ɣef umezruy n Yennayer s ɣur Mass BACUCI Ali anida i d-yessegzi laṣel n unsay-agi si tallit-nni n ugelid Cacnaq mi yennuɣ netta d ugelid aferɛun Ramsis III di tallit 950 n yissegasen uqbel tamasiḥt, yenna-d daɣen amek i d-sfugulen ansay-agi di yal tamnadṭ n tmurt n Lezayer neɣ berra n tmurt. Ɣef 12h, ters-d tanalt, imdanen akk ččan imekli n Yennayer, syin ikemmel wahil s ufraq n warrazen i kraḍ n tnelmadin n uɣerbaz alemmas i d-yufrarin d timenza di temsizelt n tzabut i d-yeḍran di ddurt iɛeddan anida i ttekin 16 n yinelmaden n yiswiren yemgaraden. Di tmeɣra-agi, yella-d aṭas n ccna sɣur icennayen d terbaɛin tidiganin akked yisefra. Di taggara, imdanen akk, ferḥen s leqdic-a, u ssaramen yal assegas ad sfuglen akka. Assegas Ameggaz.
Dahlal Chanez