Ulac win ur negri tamawt i wayen iḍerrun ussan-a deg uḥric n usegmi n tmurt. Sandika n CNAPESTE yesseɣzef asunded-ines armi ur ɣɣaren warrac.
Ayen yesḥissifen aṭas d mi ɣilen-t waṭas, ad yefru, maca yerna d timernit. Asunded-a i yellan yeɛna kan tiwilayin n Bgayet, Tizi Uzzu d Blida, yuɣal taggara-a d aɣelnaw, amek i d-yenna yiwen n yimḍebber seg CNAPESTE n Lezzayer. Ɣef wawal-is, ssebba n uɛum i tɛum deg tmurt, d asewɛer n taluft i d-yekkan seg tama n Uɣlif n usegmi, deg wadeg n ferru-ines, armi ula d nutni kkren-d d wid akk ixedmen asunded deg twilayin-a timezwura i d-nebder.Ilaq ad d-nini belli, akken yebɣu yili lḥal, akken yebɣu yili wugur neɣ akken bɣun ilin kra n yiɛeqqayen ɣef umsifham i ulac gar Uɣlif n usegmi d yimḍebbren n CNAPESTE, meɛna d arrac i yenṭerren deg tazwara. Aṭas i asen-iruḥen deg ukraḍyur amezwaru, mazal yettruḥ-asen deg ukraḍyur-a wis sin.Seg tama n yibabaten n warrac, d ayen ibanen yeṭṭef-iten wurrif d ameqqran mi ttwalin deg warraw-nsen ur qqimen, ur ɣrin; ɣas ad ruḥen tasebḥit ɣer uɣerbaz, ttuɣalen-d dindin s ixxamen. Armi dɣa, llan wid i d-yessawlen i tikli i wakken ad narfen, ad d-sbeggnen aɣiḍi-nsen ɣef wayen iḍerrun i tarwa-nsen. «Tiddukkliwin n yibabaten n warrac, ḥarent, ur ufint tifrat gar yifassen-nsent, imi ɣef leḥsab n waṭas, ugur yezmer kan ad yefru ma yella-d umtawa gar Sandika aɣelnaw akked Uɣlif n usegmi ». Akka i aɣ-d-yenna yiwen n ubabat seg Ayt Smaɛel. Asunded-a i mazal ur yeḥbis deg tmurt, yeǧǧa aṭas n wid ur t-nebɣi, am warrac, ibabaten d kra n yiselmaden yellan mgal, ad ttakken kan asteqsi-a i yimanen-nsen: “ar melmi ara ikemmel?”.
0,73% kan i d-yerran tiɣri i Cnapeste deg Tizi uzzu
Kra n yiselmaden kan i d-yerran i teɣri n sandika Cnapeste i d-yessawlen ɣer usunded aɣelnaw i yebdan ass-nni n 30 deg yennayer iɛeddan. Ɣef wakken i t-id-yenna unemhal n usegmi n lwilaya n Tizi Uzzu i yineɣmasen i yemlal deg yiwen usarag, ass-nni n larebɛa, 31 deg yennayer 2018, ala 0,73 % i iḥebsen ɣef uselmed deg lwilaya. Ɣer yimḍebber-agi amezwaru n uḥric n leqraya deg Tizi Uzzu, ssebba tamezwarut i yeǧǧan iselmaden ur tbiɛen ara asunded-agi aɣelnaw, tesɛa assaɣ ɣer wayen yeḍran, yakan, deg lwilaya, imi ussan-agi kan i yuɣalen ɣer uselmed, mebɛed mi d-yella usunded-nsen deg lwilaya seg 20 deg unbir 2017 armi d 11 deg yennayer 2018. Aya, yegla-d s leɛḍil deg wahil aɣurbiz. Limer ad kemmlen ihi ɣef uneḥbus, yezmer ad asen-iruḥ useggas i yinelmaden, ɣef wakken i walan yiselmaden akked yimḍebbren n usegmi n lwilaya. I usmekti, yessawel-d sandika Cnapeste ɣer uneḥbus n leqraya ass 20 deg unbir 2017, mebɛed mi tettewwet yiwet n tselmadt sɣur yiwet n srabes n laman (tapulist) deg tenmehla n usegmi n Tizi Uzzu, sdat n sin yimḍebbren n tenmehla-a, ɣef wakken i d-yenna Cnapeste. Syin, tekcem tuddsa-agi deg usunded u ḍelben astixer n sin yimḍebbren-agi i wakken ad uɣalen ɣer uselmed. Acu kan, ur asen-d-ddan ara yimḍebbren deg lebɣi imi, ineggura-agi, nekkren ayen yeḍran imi, ɣef wakken i d-qqaren, ulac ttbut ɣef wayen i d-yenna sandika, ihi ulamek ara stixren sin yixeddamen mebla ssebba, ɛlaḥsab-nsen. Deg taggara, ufan-asen-d tifrat, suffɣen sin-nni n yimḍebbren ɣer usteɛfu, seg leɛḍil ad tefru akken iwata imi yiwen deg-sen ad yeffeɣ tastaɣt, wayeḍ ad as-beddlen amekkan.
Mazal yettkemmil usunded deg Bgayet
Mazal yettkemmil uneḥbus ɣef uselmed, uɣur i d-yessawel sandika Cnapeste, deg lwilya n Bgayet. Aneḥubus i yebdan, yakan, deg wass-nni n 16 deg yennayer iɛeddan. Seg yimir ar tura, aṭas n tmesbaniyin, gar tikliwin akked d yibeddiyen, i texdem tuddsa-agi deg temdint n Bgayet. Tebda-tt azekka-nni n usunded, 17 deg yennayer 2018, s ibeddi sdat n tenmehla n usegmi n lwilaya n Bgayet, syin texdem wayeḍ akked tikli ass-nni n 29 deg yennayer yezrin imi ula d ccreɛ yenna-d d akken asunded-agi n Cnapeste ha-t-an berra i lqanun. Ass-nni, dɣa, deg yibeddi sdat n tenmehla i d-yenna yimḍebber n sandika, Slimane Zenati, d akken sandika-nsen ad ḍefren asunded aɣelnaw seg uzekka d tasawent, meḥsub seg 30 deg yennayer 2018. Ma ɣef ssebba n unesḥbus ɣef lxedma, yerra ṭṭlima Mass Zenati ɣef tenmehla n usegmi n Bgayet ur nquder ara ayen ɣef wayeg msefhamen deg temliliyin i xedmen netta d tenmehla-agi deg ussan n 9 d 11 duǧember 2017. Ɣef wakken i d-yemmeslay yimḍebber-a n sandika, aṭas n temsal i mazal ur frint ara, xas akken mmsefhamen fell-asent. Acu kan, seg yimir ar ass-a, yal tama tesseḍlam tayeḍ, tettarra-tt-id ɣef tayeḍ deg ucbak-agi i deg-i weqqɛen yinelmaden akked yimawlan-nsen.
Kaissa Khalifi/H. M.