Am wakken i t-id-ɛeyynen ssrabes n waddad n tegnawt kra n wussan ɣer deffir, yella udfel di ttiɛad tazwara n ddurt iɛeddan deg waṭas n tamiwin n tmurt n leqbayel i iɛeddan 700 n tmitratin deg teɛlayt. Ulamma ɣer kra n yiḥricen n lɣaci, igellu-d udfel-a s kra n tumert i wulawen, seg tama-nniḍen, yettawi-d aṭas n wuguren i yettarran tudert tewɛer. D ameslay ladɣa ɣef yiberdan i ireggel deg tuddar, yettaǧǧa imezdaɣ, ḥeslen deg yiwet n tama, war isufar n useḥmu d wučči. Am deg tɣiwant n Ayt Smaɛel, imi tuget n tnezduɣin, zgant-d ɣef teɛlayt i yugaren 700 n tmitratin, ayen akk i d-yeɣlin d adfel iḥettem taɣiwant n Ayt Smaɛel, ad tesseqdec sḍis n yikamyan n tukksa n udfel seg yiberdan. Imi dɣa tanezzayt mi d-kkren, ufan-d yimezdaɣ ddeɛwa akk d tamellalt, iberdan i yessawaḍen i wul n tɣiwant ttwareglen. D ayen i yeǧǧan ula d imḍebbren n tɣiwant-a, ɛeddan s timmad-nsen ɣer temnaḍin anda ttwaḥezqen yiɣermanen, akken ad d-sbeyynen ibeddi-nsen yid-sen, ad ḥeḍren i tegnatin-nni n userreḥ n yiberdan. « Ula aseggas-a, iḥuza-aɣ-d akken ilaq udfel. Ahat iɛedda 30 n yisantimen deg tehri. Limmer mačči d iqeddacen n tɣiwant, ur tesɛiḍ anwa ara yeffɣen seg uxxam-is ». I aɣ-d-tenna yiwet n tmeṭṭut seg taddart n Tala Ɛṭa. Ilaq ad d-nini d akkken taddart-a gar tid yettenṭerrayen s waṭas mi ara d-yewwet udfel. Ddurt-a iɛeddan dɣa, send ad awḍen wid itekksen adfel, aṭas i iwalan ulamek tuffɣa s tkerrust neɣ deg tumnayt (transport), subben-d dɣa ɣef uḍar teɣzi n kraḍ n yikilumiṭren neɣ ugar. Ula d axeddim, llan wid iɛeṭṭlen ɣef umkan, llan wid ur nusi akk. Lɣaci n temnaḍt-a tafellayt, ssaramen limmer, sya ɣer sdat, tukksa n udfel ad d-tettili send 06:00 n tsebḥit, akken ad izmiren ad kkren i yiqeddicen-nsen.
M. K.