Accueil Tamazight «Ulamma yeǧǧa-aɣ, maca yeǧǧa-aɣ-d »

RAḤIM Zrin 8 n yiseggasen ɣef tmettant-is : «Ulamma yeǧǧa-aɣ, maca yeǧǧa-aɣ-d »

750
- PUBLICITÉ -

Ass-nni ttlata yezrin 13 deg furar 2018, i wwḍen 8 n yiseggasen ɣef wasmi teḥzen tezlit taqbaylit, am wakken daɣen i yeḥzen udrar n At Ɛissa Mimun, imi tewwi lmut taɣeddart yiwen n ucennay ilemẓi, i d-yefkan aṭas i temnaḍt-is n Wagennun neɣ tmurt n Leqbayel s umata.

- PUBLICITÉ -

Ulamma ɛeddan yiseggasen-agi am lebraq, maca mazal imdanen cfan ɣef wasmi i d-yewweḍ yisalli n tmettant n ucennay Muḥ Raḥim. Ulac win ur iɣaḍ ara asmi yemmut, yeḥzen ula d adrar i t-id-yefkan. Azekka-in n temḍelt-is, ulac ansi ur d-usin ara lɣaci, ula d icennayen ddeqs i iḥedren lǧanaza-s.

Tudert-is

Ilul ucennay ameqqran Muḥ Raḥim s yisem-is aḥeqqani Muḥamed Raḥim, ass n 7 deg useggas 1963 deg taddart n Yimqecren, deg lɛerc At Ɛissa Mimun, deg temnaḍt n Wagennun, yetabaɛen ɣer lwilaya n Tizi Uzzu. Asmi yesɛa 6 n yiseggasen deg leɛmer-is, yekcem ɣer uɣerbaz amenzu, yellan deg taddart n Yiɣil n Wuccen. Yuɣal yewwi-d akayad n taggara n uswir amezwaru, dɣa ikemmel almud-is deg uɣerbaz alemmas “CNET” n temdint n Tizi Uzzu. Yeɣra dinna rebɛa n yiseggasen. Si zik-is icennu i yiman-is akked yimeddukkal-is n ulmad d yiselmaden-is, ulamma deg tallit-nni d lɛib win yettɣenin. Deg useggas n 1974, yefka-as-d ɛemmi-s tagiṭart n blastik neɣ n ukawačču, dɣa dinna i yebda yettḥafaḍ tiyita n tgiṭart. Ma deg useggas n 1979, yekcem ɣer tesnawit Amiruc, yellan deg temdint n Tizi Uzzu, mebɛed mi d-yewwi akayad n taggara n uswir n uɣerbaz alemmas. Yeɣra deg tesnawit-agi, 3 n yiseggasen armi d asmi yewweḍ ɣer ukayad n lbakarurya (lbak).

Amecwar n ccna-s

Dɣa deg useggas-agi n 1981, i yexdem tizlit-ines tamezwarut, iwumi isemma “Taɛekkumt”, syin akkin aṭas n tezlatin i yerna ɣef teɣzi n useggas. Ma deg 1982, yessekles tasfift-is (K7) tamezwarut deg temdint n Yiɛeẓẓugen, maca ur d-teffiɣ ara akken yelha, dɣa yebra i ṭṭbel deg waman. Ass n 13 deg waggur n yennayer 1984, yessers iḍerren-is i tikkelt tamezwarut deg tmurt n Fransa. Yerra ɣer mmi-s n ɛemmi-s, yellan deg temdint n Lille, yeqqim dinna ɣur-s 30 wussan, syin akkin iruḥ ɣer temdint n Paris, yuɣal yezdeɣ dinna. Mi yewweḍ ɣer din, yufa acennay Fahem yesɛa ttberna d usečču, dɣa yexdem yid-s armi d meɣres 1984. Deg taggara n meɣres, yekcem ɣer ustudyu yessekles tasfift, i d-yeffɣen aggur kan membeɛd ɣer tezrigin n Azwaw deg Barbès. Syin akkin, yurǧa alammi d aseggas n 1986, yerna-d tasfift-is tis snat, ɣer tezrigin Akfadu. asmi i iwala belli yettwassen, yerna leḥhunt tesfifin-is deg ssuq, dɣa deg useggas n 1990, yerna-d tis tlata. Ma deg useggas n 1992, yessuter deg umsizreg-is Ɛumer Akfadu, i wakken ad as-yexdem takasiṭ s tvidyut, i 8 n tezlatin-nni yellan deg tesfift-nni tis rebɛa, i wazal n ssaɛa. Deg useggas n 1995, yessuffeɣ-d tasfift-nni i wummi isemma “Iyya-d ad am-iniɣ”, yellan d yiwet n tezlit gar tezlatin yellan deg-s, i yehda i tmeṭṭut-is tamezwarut Fatiḥa, yecna akked Ḥamida yuɣalen umbeɛd d tameṭṭut-is, ukkud i d-yesɛa sin warraw-is, amenzu d Massi deg useggas n 1997, ma deg useggas n 2000 terna ɣur-sen teqcict semman-as Tafat. Deg useggas n 2000, yexdem snat n tezlatin “Dda Weɛli” d “Ḥader iman-im” akked tmeṭṭut-is Ḥamida, snat-agi n tezlatin, kemmlent sulint ccan-is d yisem-is deg unnar n ccna, membeɛd tinna n “Iyya-d ad am-iniɣ”, i swayes yettwassen aṭas. Ma d tizlit taneggarut yexdem d “Acimi Acimi” i yehda daɣen i tmeṭṭut-is tamezwarut Fatiḥa, ur nesɛi ara dderya.

Tisfifin-is

Deg useggas n 1984 : Yessuffeɣ-d tasfift-is tamezwarut “Lsas”, i d-yefɣen ɣer tezrigin Azwaw, d tasfift ideg ara naf 8 n tezlatin-agi: 1. Ssmaḥ 2. Lezzayer 3. Taɛekkumt 4. Lsas 5. Ur ẓriɣ 6. S lebɛid…atg Deg useggas n 1986 : Yessuffeɣ-d tasfift-is tis snat “Zaɛbala”, i d-yefɣen ɣer tezrigin Akfadu, d tasfift ideg ara naf 7 n tezlatin-agi: 1. Zaɛbala 2. Lxedma-lagedma 3. Ameṣruf 4. Ay ul-iw 5. Gulleɣ ar kem-sɛuɣ 6. Malika 7. Tasekkurt. Ma deg useggas n 1990 : Yessuffeɣ-d tasfift-is tis tlata “Aḥlili aḥlili”, i d-yefɣen ddima ɣer tezrigin Akfadu, d tasfift ideg ara naf kan 06 n tezlatin-agi: 1. Aḥlili aḥlili 2. Tibḥirt 3. Lebḥer n ul-iw 4. Ar xuya-s ay aḍebbal 5. Ay ass deg wussan 6. Yebna-tt Ṛebbi tuli. Deg 1995 : Yerna yessazreg-d tasfift-is tis rebɛa “Iyya ad am-iniɣ”, ideg ara naf 7 n tezlatin-agi: 1. Iyya ad am-iniɣ 2. Berriq wagu 3. Lɣiba iḍulen 4. Mi refdeɣ leqlam 5. Rǧiɣ zzher 6. Yewweḍ-d unebdu 7. Ass mi deg i d-nemlal. Deg 1997 : Yerna yessazreg-d tasfift-is tis xemmsa “Acimi acimi”, ideg ara naf 7 n tezlatin-agi: 1. A nnger-ik ay ul 2. Nniɣ-am ruḥ anef-iyi 3. Ameɣbun-iw 4. Teǧǧa-yi tmacint 5. Anda akken i d-zedmeɣ 6. Acimi acimi 7. Am wallen tiberkanin. Ma deg 1999 : Yessuffeɣ-d album-is wis setta, iwumi isemma “Ḥader iman-im”, ideg llant 7 n tezlatin-a: 1. Dda Waɛli 2. Lezzayer uxeṣṣar 3. Ay ul-iw sussem 4. Leɣder 5. Ḥader iman-im 6. Ttrebga n ufus-iw 7. Lexlas. Ma deg 2003 : Yessuffeɣ-d album-is wis sebɛa, iwumi iga azwel-agi “Cerwen tizemrin”, ideg llant 8 n tezlatin-a 1. Cerwen tizemrin 2. Ha-ten-d watmaten-ik 3. Yedderɣel lemri 4. Azrem s yiri-w 5. Icab uqerru 6. Yebla-yi Ṛebbi 7. A bab n yigenwan 8. Ziɣ teskiddibeḍ. Syin deg 2005 : I d-yessuffeɣ tasfift-is taneggarurt, iwumi isemma “Ay akal”, ideg ara naf 6 n tuɣac-agi: 1. Ay akal 2. Meḍleɣ ṭṭeswira-m 3. Timneggbin 4. Lɛibad n lweqt-a 5. Ccrab 6. Acuɣer a yemma.

Tamettant-is

Yemmut ass, n 13 furar deg useggas n 2010, deg temdint n Tizi Uzzu, yettwamḍel azekka-in , n 14 furar deg taddart-is Imqecren, mi yemmut tuɣ-it ala 47 n yiseggasen i yesɛa deg leɛmer-is. Yeǧǧa-d deffir-s sin n warraw-is Massi akked Tafat. Ad-nesmekti kan, seg wasmi yemmut aṭas n tejmilin i d as-yuɣalen ama deg taddart-is, ama deg Uxxam n yidles n Tizi Uzzu, ula deg lwilaya n Tubiret, xdem-as yakan tajmilt. Am wakken daɣen ad as-tuɣal tejmilt meqqren ass n lǧemɛa-agi sdat-nneɣ, 23 deg waggur-agi n furar ideg nella. Ihi, ilit d ttiɛad imi ad yili wahil d anesbaɣur, yettraǧu-ken a wid iḥemmlen akk acennay Raḥim. Ma ɣer taggara, nezmer ad nini belli ulamma iɣab fell-aɣ wudem-is, maca mzal ṣṣut-is aḥlawan yessuzun imeẓẓaɣ-nneɣ s tezlatin-is icebḥen aṭas. Xas sgunfu deg talwit a Raḥim, imi am wakken qqaren: “Ulamma teǧǧiḍ-aɣ, maca teǧǧiḍ-aɣ-d”. Imi daɣen yettuneḥsab d aɣbalu i waṭas n yilmeẓyen yettɣenin tizlatin-is, dayen ara isidren isem-is i lebda.

Adaoun Abdelghani

- PUBLICITÉ -