Am wakken i yetturaju, iselmaden imunan, ama d win i d-yufraren deg temsizzelt neɣ wid i d-yulin seg lejrida n leɛḍil, ad d-myagaren deg tallit-a n yimuras n meɣres i wakken ad kemmlen asileɣ yebdan yakan deg waggur n ɣuct yezrin. Sin n yiɣerbazen i yeldin tiwwura-nsen i tannant-a i wakken aɣerbaz alemmas Hedduc saɛid ad imager iselmaden n uswir alemmas d wid n tesnawit, ma d aɣerbaz alemmas Ddubaysi yettwaheyya i yiselmaden n uɣerbaz amezwaru. Aneggaru-a, ideg llan nnig n 500 n yiselmaden imunan, ttilin-d yid-sen imaswaḍen-nsen anda i asen-skanayen tarrayin n uselmed, aseddu n tneɣrit d wayen yerzan izerfan d wayen yetturajun seg uselmad. Aya, yettili-d ula deg yiswiren-nniḍen, anda ula d tapsikulijt, tedda-d deg wahil n usileɣ, imi fell-as dɣa i yers lsas n uselmed. Imi d tagi i d tallit tis tlata n usileɣ, iselmaden imunan ad heyyin iman-nsen i yikayaden ara sɛeddin deg wayen i ɣran, i wakken ad fɣen s kra n yikerdasen ara ten-yeǧǧen ad ttuneṣben deg yimukan ideg sɣaren.
M. Smail