Aḥric wis 3
Azekka-nni, tessefqed s aẓekka n yemma-s am yal ass, tewwi yid-s axeclaw-nni, teẓẓa-t γef uẓekka, tettru, tettru, tettru almi uγalen yimeṭṭawen-is ugaren taεwint, yeswa yis-sen uxeclaw-nni. Yegma uxclaw-nni, yerna yeffγ-d deg-s yiwen useklu “ ttejṛa “ igerrzen. Tuɣal Mm yiγiγden, trezzu kraḍ n tikkal deg wass γer uẓekka n yemma-s, tettru, tettεenni s ddaw useklu-nni. Yal tikkelt tettwali yiwen ufṛux d acebḥan yettadad gar yifurkan-is. Mi tεenna deg-s kra, ad as-t-id-iḍeggerr din, din war tuzya d tunḍa neγ yejneε yefne&epsilon,; ugur ur yelli. Yewweḍ-d wass ideg agellid n at Mliyikečč ira ad isseḥḍer tameγra ideg ad tt-id-uraren iḍebbalen, icennayen, tawsa d waẓ akin, ad yenced akk tullas n yal tamnaṭ akken ad yefren mmi-s tin ad as-yeččaṛen tiṭ. Akken i d-yewweḍ isalli, tirbibin n baba-s n Mm yiγiγden, uccagent γer lewqam war ma uḥtament. Ssawḍent-as isalli ula i nettat mi akken i d as-sawlent, nnant-as: ‘’Aha tura eğğ leqdic-nni, yya-d mmceḍ-aγ iqeṛṛa-nne&gamma,; wenneε-a&gamma,; gerrez-a&gamma,; ssfeḍ-aγ daγen tarkasin alamma ttiṛṛiqent akken yessefk, nennubget s tujjma deg lbeṛj ugellid i lmend n tmeγra ara yesker akken ad yaf mmi-s tin ara yessenquqlen ul-is, ad tuγal d tameṭṭut-is ‘’. Teqdec-asent M yiγiγden akk ayen uṛğant seg-s, maca tettru daγen, acku ira wul-is ad teddu γer ccḍeḥ ula d nettat. Tessuter di yambaba-s “ tameṭṭut n baba-s” ad as-tanef ad teddu d yessi-s. Yambaba-s: ‘’Amek a yelli? Kemm a M yiγiγden yugaren sidna Yub ara yeddun s wammus d tebrek-nni yakk i kem-yulin γer tmeγra ugellid?’’ Ula d icettiḍen d tarkasin n menwala mačči tesεiḍ-ten am kemm am tezyiwin-im, ad aγ-d-ternuḍ tura ccḍeḥ-im? Ah a lalla, ah a lalla!’’ Seg wakken teggumma M yiγiγden ad as-tebru i wawal, terreẓ-as aqeṛṛu i yambaba-s s uεenni, tuγal tesseγli-d imeslayen-agi deg yimi-s taggara, tenna-as: ‘’H-t-an surgeγ-am iγiγden γer teqbuct n tεedsin, ad am-fkeγ snat tmirin (sswayeε), ma tessawḍeḍ tsefḍeḍ akk lğerra n yiγiγden, terriḍ yal aεeqqa yettiṛṛiq amzun werğin yumis, ad medleγ allen-iw, ad am-anfe&gamma,; ad tedduḍ yid-sent. Taqcict akken tesla i lehḍuṛ-nni, teffeγ γer beṛṛa, terra γer deffir teḥnact, tessawel s igenni:
‘’Ay aεssas ur neččax, ay at wass-a d yimir-n.
Azent-iy-id yakk ifrax, ceyyeεt-iy-id itbiren!
Yelwa s tqabubt s txenfuct,
Ad yesfed iγiγden seg teqbuct!”
Tekcem γer teḥnact, tessa yiwet n tmeḥremt tazedgant γef tγerγert, tesmar-d γur-s tiεedsin-nni s iγiγden isebken fell-asent, teslal kan taqbuct-nni s waman almi i as-d-ččuṛen sin yitbiren tawwurt, din, din ḍefren-ten-id akk yifṛax yellan s ddaw yigenni mecḥen akk iγiγden-nni…
Tettkemmil
Yerra-tt-id seg talmanit Essaid Ait Maamar