Deg yiseɣrez amaynut 2018 n unaẓur Ṭaleb Ṭaher, yella wanida i d-yewwi amaynut ama seg tama n uẓawan neɣ n usefru. Ad d-naf deg-s 9 n yizwilen: “Agellid”, “Jeddi, Jidda”, “Aṭṭan”, “Qqim kan qqim”, “Dduḥ-iw gar sin n leqrun”, “Amehraz“, “Lefhama“, “Ameksa“ akked “Amendil“. Deg tezlit tamezwarut ideg yekki ucennay ameqqran Ɛetmani, yella usqerdec ɣef tmurt d tayri-s s umata. Tizlit “Jeddi, Jidda”, yecna deg-s tujjma n zzman aqbur. Amek tessenfel tudert d liḥala n uxxam, imi aṭas i yettwaǧǧen d iɛeryanen. Yeqqar : « Ukiɣ-d kkreɣ tasebḥit, walaɣ ddunit, tban-iyi-d amzun teččeḥ ». Deg tis kraḍet, i d-yebda s tezlit n Ayt Bumendil, iger unaẓur awal n tekyes d usebɣes i umuḍin, akken tebɣu tili lḥala. Abeɛda wid yezgan xaqen di sbiṭar, guggen ɣef uxxam d yimawlan. Maca daɣen deg-s tajmilt i yinaẓuren merra i tewwi tmettant. Yella ussefru deg tezlit tis ukuẓet, s uzwel n “Qqim kan qqim“, ɣef ugama n kra n tɣawsiwin, d kra n yisuḍaf n tudert. « Qqim kan qqim yir aserdun ur t-ttdeqqim ɣas ad yeddu d yileɣman. Qqim kan qqim, yir asɣar ur yettleqqim ɣas njer-as targa n waman. Qqim kan qqim, yir argaz hder neɣ qqim yerna ad ak-yexdeɛ di laman ». Tizlit i d-yusan deffir-s, iwumi isemma “Dduḥ-iw gar sin n leqrun“, iga-d taḥawact s tɣara-is ɣef tikli n tudert-is d tlufa n zzman. Ideg yenna tazwara: « Ddunit am umezgun, wa yurar-itt d aɛeggun, wa yurar-itt s lefhama ». D ameslay ɣef tezlit tis 6, iban-d umaynut ula di tmeɣrut i yebna s ABC. D kra seg wayen yenna deg-s dɣa: « Ṭaleb Ṭaher mi ak-yewzen, fiḥel leḥruz, fiḥel llif d lhemza ». Yeqqar daɣen deg tsetna n taɣect “Lefhama“: « Anda tella lefhama, win d-temlaleḍ ad tferḥeḍ. Anda akken ulac lefhama, rfed lqecc-ik truḥeḍ ». Deg tezlit tis ṭamet “Ameksa“, nezmer ad nsel i: « Aql-i qqleɣ d ameksa, d lmal n medden i kesseɣ, tameddit mi ara t-id-rreɣ, s imawlan-is. Ur ttɛeddiɣ ɣef tlisa, ẓriɣ anida ara ɛefseɣ, tedduɣ s lqis ». S wudem n tkessawt ihi, yewwi-d Ṭaleb Ṭaher kra n yimedyaten ɣef lɛada d tmussni n tudert. Ahat d asmekti n tigawt-a i yettuqan, imi ula d netta yella d ameksa di tegrudant. « Amendil » d tizlit taneggarut deg yiseɣrez-a. Akken i d-yeqqar uzwel-is, yerra-d awellih unaẓur ɣer uselsu-a ansayan i simmal yettenqas useqdec-ines taggara-a. Deg wawalen-nni n useḥbiber d usaki, yenna-d abeɛda: « Kemm lasel-im ur t-ttbeddil, cfu i am-d-tehder yemma-m. Kem lḥiǧab-im d amendil, irennu-am di lqima-m ». Album-a, i yettnuzun akka tura deg tḥuna n yiḍebsiyen n ccna, tlaq-as s tidet tmesliwt.
M. K.