Wid akk iḥemmlen urar n ccatranj, ladɣa deg ttawil n usnas, zemren sya d tasawent ad fernen « Taqbaylit » deg wumuɣ n tutlayin n usnas aziraz Chess.com. Mbeɛd kra n yimalasen n uqeddic, ssawḍen yimsidag (imsuqal) ad d-rren si teglizit ɣer tutlayt n Mulud At Mɛemmer, ugar n 6000 n wawalen. Dɣa, ma nekkes kan tira n temsirin, i yellan kan s teglizit ar tura, tinefrunin-nniḍen llant merra s teqbaylit. Tazwara, ḥaca deg ulqem Beta i nezmer ad naf taqbaylit, imi d tallit n uɛraḍ, maca tura tettwassekcem ula deg ulqem azayez unsib. Ihi, wid iḥemmlen urar-a, zemren kan ad kecmen ɣer Play Store, ad d-zedmen asnas-a ara asen-d-yemmeslayen s teqbaylit. Ad d-nesmekti d akken ula d asenfar n usuqel n wadeg Web n Chess.com ɣer teqbaylit, ha-t-an ileḥḥu akka tura. S wugar n 44 000 n wawalen, ahat ad yeṭṭef usenfar-a kra n wakud akken ad yamed. Aya ad d-yawi ugar n ubaɣur i tutlayt taqbaylit i yettnernin seg lweqt ɣer wayeḍ.
Kaisa Khalifi