TUSSATIN d amud n tullisin d-yefɣen di yennayer 2968 /2018 deg-s azal n sdis n tullisin yemgaraden di teɣzi d temzi, izewwal-nsent d wi : Azemzi, Tayri d wawal, Tirgazin, Timlilit, Tagrawla, Tayri d wayen-nniḍen.Tullisin-agi, ttwarunt deg waṭas n talliyin, kked seg useggas n 1998 alamma d win 2012. Dɣa ttmeslayent ɣef tlufa yellan di talliyin-agi; am yinig ɣer tmura n berra, iɣeblan n uxeddim, tagrawla… Maca, asentel n tayri, yella akk di tullisin. Tagi d tukkist tameẓyant: «Yergagi ufus n Jeğğiga seg tira imeslayen-nni, dɣa tessers imru, terfed aqerru-ines s yigenni… tḍegger d asawen yiwen uqadus n nnefs iḥuzen taftilt n trisiti… Teqqim akken kra n wakud ur iban ɣer wacu i tettmuqul… Allen-is ɣer ssqef, maca ur tettwali kra… Ɣer tagara, terra-d aqerru-s ɣer ṭtabla, tḍegger aεrur-is ɣer deffir, tsend-it ɣer ukersi, twala am wakken ameslay yewweḍ ɣer taggara-s imiren. Maca, si tama-nniḍen, ur tebɣi ara ad tekfu tira-s s yir ameslay yettruẓun asirem…» (As.24)
Sɣur ameskar Balouli Ferhat