Deg 19 meɣres iɛddan i telli tiwwura-s s wuden unṣib yiwet n tḥanut n tenzuyt n uyefki n tcekkart d isuddimen-is deg tlemmast n tɣiwant n Lemɛatqa, anda ḥedren aṭas n yimḍebbren n Useqqamu aɣerfan n tɣiwant n Lemɛatqa, ɣef uqerru-ines aselway n Useqqamu Mass Laguel Lyes, rnu ɣef waya aṭas n yimḍebbren n srabes yemgaraden n tɣiwant, d umaɛlem n tḥanut, imḍebbren n luzin n uyefki n Draa Ben Khedda. Ugar n 5 000 n litrat n uyefki n tcekkart i d-isaḥen i tḥanut-agi yal ass, rnu ɣef waya, tanzuyt n yisuddimen yemgaraden n uyefki seg luzin n uyefki n tɣiwant n Draa Ben Khedda. Tusa-d tḥanut-agi i tifrat n yiwen n uɣbel i icuɣben aṭas aṭas tiwaculin n temḍiqt-agi, acḥal d aseggas-aya, yeɛnan lexsaṣ n uyefki n tcekkart. Daɣen, aya, ad yessifsus taɛkumt ɣef sin (02) i iferqen ayefki deg tɣiwant, ur nezmir ara ad siwḍen ayen ilaqen ɣer twaculin. Sdat n uɣbel yerzan lexsaṣ n uyefki n tcekkart, fkan yiɛgalen n Useqqamu aɣerfan n tɣiwant n Lemɛatqa yiwen n ttesriḥ i yiwen ilemẓi n tɣiwant i uftaḥ n tḥanut n tenzuyt n uyefki n tcekkart. Aya-agi, yella-d deg wagguren iɛddan. Seld sin leddwar segmi telli tḥanut-agi tiwwura-s, ferḥent twaculin aṭas seg tifrat n uɣbel i ten-icuɣben aṭas d iseggasen-aya.
A. Z.