Par DDK | 16 Avril 2018 | 522 lecture(s)

Boudjima Ad tili seg 19 alamma d 21 yebrir 2018

Aheggi i tezrigt tis xemsa n rreḥba n udlis

Yebda Useqqamu aɣerfan aɣiwan (APC) n Boudjima, iɣef yella ɣef uqerruy-is Mass Boukherroub Samil, aselway n tɣiwant-agi, yettheggi iman-is i tezrigt tis semmus n rreḥba n udlis n Boudjima.

Ad tili tezrigt n useggas-agi, gar 19 alamma d 21 yebrir-agi ideg nella, deg temkerḍit n tɣiwant “Mohand Abdellah, (Mohia)”. D rreḥba n udlis deg tezrigt-is tis xemsa, ideg ara ttekkint wazal n 25 tezrigin, ara d-yasen seg ddeqs n lwilayt n tmurt, am Lezzayer tamaneɣt, Tizi Uzzu, Bgayet, Qsenṭina…atg. Gar tezrigin-agi ara d-yerzun ɣer rreḥba-agi, ad d-nebder gar-asent: Barzakh, Alpha, Casbah, Koukou, Tafat, La pensée, Tamagit, Richa Elsam…atg. Am wakken daɣen, ara yilin wugar n 50 n yimura d yimedyazen ara yexdem asenzi s ubuddu n yidlisen-nsen d wammuden-nsen n tmedyazt. Ad d-nadder kra ineggalen ara ixedmen asenzi s ubuddu n wungalen-nsen, gar-asen; Rachid Boukherroub, Ali Hadjaz, Amine Zaoui, Rabah Benamghar, Youcef Merahi…atg. Ad ilin daɣen yimura ilmeẓyen n tama-agi n Ouagenoun, yecban; Tinhinane Harrache, Aziz Dilem, Adaoun Abdelghani d wiyaḍ-nniḍen. Am wakken daɣen ara budden ammuden-nsen n tmedyazt yimedyazen-agi; Ahcene Mariche, Zoulikha Touati, Lounes Amezian, Idir Bellali…atg. Imsuddsen n rreḥba-a, heggan-d leqdicat-nniḍen i lmend n ttiɛad-agi adelsan i ttraǧun s ccuq wid iffuden tamussni n tussna akked yidles. Imi yettuneḥsab d amḍiq ussnan ideg ttemlilin yimura d yimeɣriyen-nsen, yettili-d diɣ ubeddel n tikta gar yimdanen. I lemend n wannect-agi akk, ad d-yili wahil adelsan anesbaɣur, gar yisaragen d yisikwan akked waṭas n tɣawsiwin-nniḍen ara d-yilin di ttiɛad ɣef teɣzi n tlata wussan. Ma d ahil unṣib ad d-yili akka, i wass n lexmis 19 yebrir 2018, ara yilin d ass amezwaru n rreḥba-agi, yetturaǧu ad yili deg-s ɣef 10h00 n ssbeḥ, tulya tunṣibt n tezrigt tis xemsa n rreḥba-agi n udlis, syin ɣur-s d ameslay sɣur yimsuddsen n leqdic-agi. Ma seg 13h00 alamma d 16h00 n tmeddit, ad d-ilin sin n yisaragen di ttiɛad, amezwru ad d-yesker Mass Rabar Sebaa ɣef tutlayt, ma d wis sin sɣur Mass Younes Adli, ara d-yawin awal ɣef umezruy. Ma i wass n lǧemɛa 20 yebrir, yetturaǧu ad d-yili deg-s ussisen n sin yidlisen-agi “Nomades burlants” n Massa Amina Mekakhli akked “La boite de L’islam” n Mass Amine Zaoui. Ad d-meslayen fell-asen yimeskaren i ten-yuran i yimeɣriyen, ma deg tmeddit n wass ad yili usarag ameẓyan s ṣṣenf n “Table ronde”, sɣur Abdelmadjid Merdaci, Sofiane Hadjadj, Youcef Tounsi akked Habib Tengour, ara yerren tajmilt i Noureddine Saadi. Ma seg 14h30 n tmeddit, yetturaǧu ad d-yili usarag wis tlata n umaru Tarik Djerroud. Yetturaǧu daɣen ad yili ussisen n sin yidlisen-agi “D wagi i d asirem-iw” n Mass Zarouri Mustapha akked “Excuses d’outre tombe” n Mass Kheir-Eddine Merrad Boudia. Ara d-imeslayen i yimeɣriyen ɣef yidlisen-agi i yuran. Ma deg tmeddit n was, ad yili usarag ameẓyan s ṣṣenf n “Table ronde”, sɣur Mass Said Chemakh, Allaoua Rabhi akked Amar Imegrachene. Syin akkin ɣef 14h30 n tmeddit, ad d-yili usarag wis rrebɛa ɣef Si Muḥend U Mḥend sɣur umaru amnadi Rachid Oulbsir. Am wakken daɣen i yetturaǧu, ad yili wahil uzzig n yisikwan ɣef teɣzi n tlata wussan, gar-asen asikew n tmucuha, asikew n teklut, asikew n usnulfu, win n usuneɣ…atg. Ad tili diɣen tiddukkla tadelsant Lyra n Boudjima, deg ttiɛad s turart n yiwet n tmezgunt s tmaziɣt.

Ha-t-an wayen i d-yenna Mass Boukherroub Samil:

“D akemmel i nkemmel ayen i d-nebda yakan, acu kan yal aseggas nettaɛraḍ ad d-nawi iwudam imaynuten i wakken ad ten-issinen madden. Nebɣa diɣ ad d-nesbin imura n temnaḍt-nneɣ, ladɣa ilemẓyen seg-sen, yerna ad asen-nefk tagnit i wakken ad senzen idlisen-nsen wa ad magren imeɣriyen-nsen. Iswi-nneɣ agejdan d aseqreb n udlis s imeɣri u d tagnit daɣen n tmussni gar umeɣri akked umaru. Nekk ttwaliɣ rreḥba n udlis am taggara n teqbuct n ddunit, i yettḥettimen lɣaci ad ferǧen ad slen…atg, ula d rreḥba n udlis akken, tettak lebɣi i medden akken ad ɣren, akken ad issinen. Ssarameɣ kan, tiɣiwanin-nniḍen n ladayra-nneɣ, ad xedment akka neɣ ugar, i wakken ad d-nessuffeɣ tamnaḍt-agi n Ouagenoun seg tatut, ad tuɣal ad tettwibder am temnaḍin-nniḍen”.
G. A.

0