Par DDK | 16 Avril 2018 | 760 lecture(s)

Tizi Uzzu seg 25 deg yebrir ar 2 deg maggu 2018

Tazrigt tamezwarut n rreḥba taɣelnawt n yisufar iqburen

I tikkelt tamezwarut, ad d-yesuddes ugerzu n Tizi-Uzzu, tamesrit taɣelnawt n yisufar iqburen yemgaraden ( salon national des saveurs-terroirs et paniers gourmands, SNAST), ara yilin seg 25 deg yebrir ar 2 deg maggu 2018 deg umraḥ n Tzemmurt deg tlemmast n temdint n Tizi-Uzzu. Deg yiwen usarag n tɣamsa i yexdem yimeḍebber amezwaru n umaris ( cabinet) n lwali, Mass Dahri akked yinemhalen n srabes yemgaraden i yekkan deg usuddes n ṛeḥbba-agi, anda ara naf anemhal n tmarrit, anemhal n tenzzuyt d unemha n srabes n tfellaḥ. Aṭas n yisallen yerzan tamesrit i seg i d-wekden yimḍebbren-agi. Dɣa deg tazwara n usarag, yuɣal-d Mass Dahri s wawal ɣef yiswi agejdan n tedyant-agi, yenna: ‘’ Tamesrit-agi d yiwet n tegnit ara yefken afud i telḥin d unegmu n lɣella tadigant’’. Ɣef leḥsab n unemhal n Srabes n tfellaḥt n Tizi Uzzu, Mass Makhlouf Laib, ugar n 385 i yettuɛegnen ad ttekin deg rreḥba-agi, ad d-asen seg 48 n yigerzuyen n tmurt n Lezzayer, yetturaju daɣen tirza n ugar n 20 000 n yinerzafen. Gar wahil, ad naf : timsekniyin n yisufar n tfellaḥt yemgaraden, Izegza d yigumma, zzit n uzemmur, tament, tazzart, isufar n uyefki yemgaraden. Daɣen ad ilin wid ixeddemen iɛeqqaren, wid yettrebbin iɣersiwen, wid ixeddemen uraɣ d teẓruft d wayen-nniḍen. Aṭas n yimussnawen ara iḥeḍren deg tadyant-agi i wakken ad welhen, ad fken afus n tallelt i yifellaḥen, i wid yebɣan ad seftin idrimen-nsen deg yiḥricen i icudden ɣer yisufar iqburen, deg tfellaḥt. I lmend n tedwilt-agi, ad ilin daɣen isaragen ɣef tarrayin n usufeɣ n lɣellat tidiganin, ttawilat n unegmu n tdamsa n temḍiqt n leqbayel, udmawen imaynuten deg usnerni n lɣellat...atg. Am wakken ara ilin yiskwan yemgaraden ɣef usewwi n Leqbayel ... Deg wayen i d-iwekked unemhal n tmerrit n Tizi Uzzu, ugar n 200 n wid ara ittekkin deg tmesrit n ugerzu n Tizin Uzzu. Aṭas n leqdicat yettwajerden deg wahil n rreḥba n SNAST 2018, dɣa tettuɛeggen yiwet n temsizzelt deg waṭas n yiḥricen.
Ali Zalouk

0