Accueil Tamazight Asileɣ ɣef tigawin n usellek

Iderginen : Asileɣ ɣef tigawin n usellek

212
- PUBLICITÉ -

Thegga-d ussan iɛeddan tddukkla Oxy-jeunes lwaḥi d tddukkla Abrid n Talwit n Bgayet yiwet n tedwilt n usileɣ ɣef usellek neɣ ɣef yisillifen (gestes) imezwura n usellek. Deg teɣzi n sin n wussan, aṭas n yiwellihen i yettunefken i urbaɛ yekkin, tuget seg-sen d ilemẓiyen, sɣur Massa Faṭma Brahimi i yettuxessen deg tallelt tamezwarut n usellek, i yellan daɣen, akka tura, d timḍebbert deg uḥric n usellek deg tddukkla i d-nebder: Abrid n Talwit. Ilmeẓyen yekkin, gar-asen tuget n wid i d-yusan seg Yiderginen, s ubrid n tddukkla turmidt Oxy-jeunes i yettwassnen s leqdicat-is, i d-iheggan timlilit, lemden aṭas n lecɣal yeɛnan tigawin timezwura n usellek n win yuḍnen neɣ n win yeɣlin. Imi ddaw leɛnaya n yiselmaden-nni, ssawḍen ad walin amek i d-yettili ccɣel-nni, syinna, ɛeddan ɣer ukayad. Meḥsub ḥefḍen qbel kra n temsirin akken ad ɛeddin deffir-s ɣer usemres i yellan d agejdan, ad weznen daɣen imanen-nsen, ad walin aswir-nsen deg usileɣ i d-yellan. Dɣa, xedmen asteɛmel neɣ am urar i d-uraren kra n tegnatin iweɛren, ama n tɣelyawt, n uɣraq, n dduxa tameqqrant neɣ yisehwa, atg. Aya, i wakken ad jerrben, ad heggin imanen-nsen i teswiɛt ideg ara yeḍru s tidet wayen-nni, ad issinen daɣen amek ilaq ad lhun d tfekka n umdan, ad as-ddun mi ara tili ur tuki, bab-is truḥ-as tefrit, neɣ mi ara tili deg waddaden yesran i usellek. Ad teqqim tigawt-a i d-heggant snat n tddukkliwin d tin ara d-yefken abaɣur-is imi isillifen imezwura n usellek lhan i umdan neɣ i tmetti s umata skud ssemnaɛen-d tikwal seg tmettant i d-ibanen teqreb. Nessaram ihi ad ilin s waṭas wid ara yegren deg uḥric-a, ara yebɣun ad kesben tamussni-a n usellek i yezmer ad yaf kra n win i tent-yuɣen.

- PUBLICITÉ -

Kaissa Khalifi

- PUBLICITÉ -