Accueil Tamazight Timlilit taseklant n Mass Ɛmer Mezdad

Tubiret : Timlilit taseklant n Mass Ɛmer Mezdad

1202
- PUBLICITÉ -

Sendiḍelli n ssebt, 05 deg waggur-agi n maggu ideg nella, ɣef 10h00 n ssbeḥ, i d-tella temlilit tamezwarut deg useggas-agi amaynut n 2018, sɣur uneggal d umejjay Ɛmer Mezdad. Tella-d deg tzeqqa tameqqrant (Amphi) n ugezdu n tutlayt d yidles amaziɣ n tesdawit Muḥend Akli U Lḥaǧ n Tubiret. Yemmeslay-d deg-s ɣef usentel-agi agejdan “Tirmit n tira taneggalt ɣer Ɛmer Mezdad”, am wakken i d-yewwi awal s telqayt ɣef tira n wungalen-is s uzzig akked wungal akbayli s umata. Yezzi daɣen awal deg temlilit-agi, ɣef tira n wungal s teqbaylit d tirmit-is netta imi s timmad-is d aneggal. Amek armi i d-yezger seg tujjya ɣer tira n tsekla ladɣa ungal? Neɣ s wawal-nniḍen amek armi i d-yufa iman-is d aneggal n xemsa wungalen, ulamma netta d amejjay? Yella-d daɣen uskasi sɣur wid i iffuden tamussni d yidles, imi netta yeɛreḍ amek ara d-yerr akk i yisteqsiyen i d as-yettunefken ɣef teɣzi n ssaɛa. Ad d-nesmekti kan belli Ɛmer Mezdad, d aneggal n xemsa wungalen-agi s teqbaylit: Iḍ d wass 1990, Tagrest urɣu 2000, Ass-nni 2006, Tettḍili-d, ur d tkeččem 2014, Yiwen wass deg tefsut 2015. Am wakken daɣen yura ammuden n tmedyazt akked tullisin, yesizrig-d diɣ tasɣunt Ayamun.

- PUBLICITÉ -

Gh. A.

- PUBLICITÉ -