Agraw n tddukkliwin n Leqser (Amaziɣ, Talwit, Tafat akked Leḥsan), heggan-d ass-nni n lǧemɛa yezrin, yiwet n tejmilt meqqren i ucennay ameqqran Taleb Tahar. Tameɣra-agi n ccna, tella-d i lmend n usmekti n umulli wis 38 n Tefsut n yimaziɣen (20 yebrir 1980) akked umulli wis 17 n Tefsut taberkant (20 yebrir 2001). D tameɣra, ideg cnan aṭas n yicennayen, ad d-nebder gar-asen; Belaid Tagrawla, Youcef Guerbas, Mouh Arif, Malek Kezoui, Ouahioun Houcine, Hemali Nourdine, Taleb Kader (mmi-s n Taleb Tahar),… d wiyaḍ. Tella-d daɣen terbaɛt Ixulaf n umezgun, i d-yuraren yiwet n tmezgunt s teqbaylit. Yella-d leqdic-agi adelsan, ass-nni n lǧemɛa yezrin ɣef 17h00 n tmeddit d tasawent, deg Umraḥ azayez (Place public) n tɣiwant n Leqsar, deg lwilaya n Tubiret.
G. A.