Seld tuffɣa n tsemhuyt n tegrest, iban-d ubaɣur n yigeffuren i d-yewwten deg-s ɣas gan ula d kra n temḍerrit seg tama-nniḍen. Imi ma nemmeslay ɣef wakal nezmer, ad d-nini laqen-as waman s waṭas deg ccetwa, yewwi-d ad isew i wakken ḥamu n yiṭij n tsemhuyt n unebdu ur t-yettḍurru ara. Tekcem-d ihi tefsut s kra n wussan, tebda kan tesjuǧǧug imɣan-is, iban-d wamek yella aseggas-a usaɣur, d wamek irew s waṭas. Ad d-nefk amedya n temnaḍt n Ayt Smaɛel ideg gten wid yettrebbin lmal d wulli, neɣ wid itesran i tilin n yimɣan i itett lmal-nni, gar-asen asaɣur-a i yesmenyif i tuččit ugar n yiḥcicen-nniḍen. Daymi tarawt-is n useggas-a tessefreḥ nezzeh imezdaɣ n tɣiwant n Ayt Smaɛel, ladɣa wid yesɛan drus n tferkiwin, acku yettfakka-asen lqerḍ s lemɣawla, dɣa ttuḥettamen ad t-id-aɣen s ssuma ɣlayen. Ladɣa deg wayyuren n tegrest ideg tikwal ageffur d yir addad n tegnawt ur ttaǧǧan amdan ad yeffeɣ ad iruḥ ɣer teẓgi ansi yezmer ad d-yeqleɛ kra n yimɣan ara yečč lmal-is ma ifukk usaɣur, ur yesɛi maḍi d acu ara asen-yefk akken ur ten-ineqq laẓ. Imir-n, ur ila afran-nniḍen anagar tiɣin-ines sɣur wayeḍ, ɣas ttilin yiberdan anda yettnuzu qrib 1000 n yidinaren i yiwet n tbaliwt. Aseggas-a ihi, ad yili yemgarad ɣef wayetma-s iɛeddan skud yefti yimɣi-a n usaɣur. Imi ɣef wawal n kra n wid yessnen neɣ ijerrben timsal-a, ad tsubb ssuma n lqerḍ s waṭas, ad yuɣal yettnuzu ahat seg 300 armi d 400 n yidinaren i tbaliwt. « Numer mačči d kra mi icaḍ usaɣur aseggas-a. Ɣas iban ad nɛeṭṭel deg ccɣel n tmegra-ines, ussan n leɛtab-is ad iɣzifen daɣen, maca nhegga i waya acku neẓra abaɣur-is yuklal-it ». I d-tenna yiwet n tmeṭṭut seg Ayt Smaɛel.
Kaissa Khalifi