Yal amdan, iseɛɛu iqeddicen yemgaraden deg tudert-is. Yettak-asen akud i asen-ilaqen akken ad ten-yefru deg teswiɛin iwulmen. Aya iban yettili-d s leḥsabat d wahil yettmaggan deg wussan, imi seg yiwet n tama, llan lecɣal i yessefk ɣef yiwen ad ten-yexdem war aɛeṭṭel neɣ ssuturen-d abellez i wakken ad frun.
Maca, seg tama-nniḍen, llan ula d iqeddicen i yezmer walbaɛḍ ad ten-yeḍfer s ttawil, neɣ ad asen-yettak drus n wakud, ɣas ahat seg win n yiɣimi-ines. Dɣa, ma nemmeslay-d ɣef lecɣal i yessihil umdan seg tikkelt ɣer tayeḍ, ad d-nebder addal i simmal ttnernayen wid yettekcamen deg-s, neɣ wid i t-ixeddmen d iqeddac n yidigan. Aya, yettili-d ama daxel n yixxamen neɣ berra, deg yiberdan d tzeɣwa-ines anda ttilin akk ttawilat-is d dduzan-is ilaqen. Deg usamar n Bgayet ihi, aṭas i yerran tamawt ɣef lexsas n tzeɣwa n waddal-a i yelhan i tdawsa n umdan, ladɣa tidak n tlawin neɣ tid anda zemrent ad t-xeddment ma bɣant. Imi ad naf kan di kra n temnaḍin tizeɣwa-nni n waddal, maca ttekcamen-tent anagar irgazen. Ɣas ahat d ayen i d-yekkan seg tama-nsent, imi tuget seg-sent ur ttakkent azal i waddal d ubaɣur i d-yessegray, ḥaca ma uḍnent kra, ceyyɛen-tent yimsujjiyen ad t-gent, wanag si tama-nniḍen llant tid yebɣan ad lhunt d tfekkiwin-nsent, ad sɛunt daɣen lqedd amurqiq yeddukklen. « Ssarameɣ seg wacḥal-aya, ad tili xersum di taddart-nneɣ yiwet n tzeqqa n waddal ara aɣ-yefken tagnit i wakken ad nxeddem deg-s tigawin ara aɣ-yessenqasen lmizan, maca ar ass-a ulac-itt. Aql-i mazal ttraǧuɣ-tt, acku ma tnuḥ-d yiwwas ad iliɣ gar tmezwura ara yettruḥun ɣer din ». I d-tenna yiwet n tlemẓit seg Ayt Smaɛel.
Kaissa Khalifi