Ass-agi n letnayen d uzekka n ttlata, ara d tili taggara n temsizzelt tameqqrant, deg tezrigt-is tis snat. Aseggas-agi, rran tajmilt i sin n yisdawanen-agi: Amara Rachid akked Amzal Kamal. Timsizzelt-agi i d-thegga tesdawit n Tizi Uzzu, tewweḍ ɣer taggara-s i ttraǧun acḥal-aya yisdawiyen. I wass-agi n letnayen 14/05/2018, ɣef 10h00 n ssbeḥ, ad d-tili temsizzelt n taggara deg leṣnaf-agi: tamedyazt, tiynimawt (monologue) akked timawit. Yal tawsit, ad d-tkkes teseqqamut n ufran sin neɣ tlata ara d-yufraren. Dɣa deg tmedyazt, ad d-fernen 3 n yimedyazen, ma deg tiynimawt, ad d-ksen 02 n yiynimiwan akked sin-nnḍen n yimennayen. Ma d azekka n ttlata, 15/05/2018, ɣef 10h00 n ssbeḥ, ad d-tili taggara n temsizzelt n ccna d uɣenni, ideg ara ttekkin ugar n 20 n yimekkiyen. Ad d-fernen gar-asen yiɛeggalen n teseqqamut n ufran, 3 n yicennayen ara d-yufraren s ssut-nsen. S wakka ara ttwaferqen mraw (10) n warrazen i wid ara d-yufranen deg yal tawsit deg temsizzelt-agi n taggara. Ɣer taggara, ad d-nesmekti kan belli, timsizzelt-a deg tezrigt-is tis snat, tebda acḥal-aya. Seg tazwara n useggas asdawan i telli tiwwura-s i yisdawanen i yebɣan ad ttekkin. Yal amecwar neɣ tikkelt, ttifriren-d kra ɣef wiyiḍ, armi i d-wwḍen wigi yeqqimen ɣer temsizzelt n taggara.
G. A.