Le figuier d’or d yiwet n tfaska ara d-yilin di tmurt n Fransa di tezrigt-is tamezwarut. Ad tili deg usensu sɣur tiddukkla tadelsant Faḍma Nsumer akked Boudaoud cinéma, seg wass n 24 ar 28 tuber 2018. D timsizzelt anda zemren wid i d-yessufuɣen isura, ad tekkin. Yewwi-d kan fell-asen akken ad aznen isura-nsen ɣer tensa-agi : [email protected]. Ɣef waya, nemmeslay akked Mass Younes Boudaoud , netta d yiwen i d-yessufuɣen isura s tutlayt n tmaziɣt, ad nader gar-asen : ‘’Ma mère ma dit’’ s kraḍ n yiḥricen-is. ‘’Aqlaɣ nuɣal-d, ‘’Daa meqqran’’ s sin yiḥricen-is, ‘’Werdiya n 13’’ , ‘’Wecṭuṭi’’, ‘’Axxam n mmi’’ s sin yiḥricen-is , ‘’Blonde et brune’’ , ‘’Asaruf’’. Yenna-d d akken isura-is lulen-d di lḥif d ayen i t-yeǧǧan ass-a ad yexdem timsizzelt-a akken ad yefk afus n tallelt i yilmeẓyen Mass Boudaoud d yiwen gar wid id iheggan timsizzelt-agi, ha-t-an d acu i d-yenna i Uɣmis n Yimaziɣen : ‘’Tafaska-agi, nexdem-it-id i wakken ad nefk afud i yilmeẓyen akken ad sbeggnen ayen i xeddmen imi nettwali ulac win i d-yerran lwelha ɣur-sen. Arraz ad yuɣal i le meilleur scénario , meilleur auteur, meilleur actrice. Ad tili tmeɣra i lmend n ufraq n warrazen. Acebbeḥ n tqaɛet ad yili akk d amaziɣ, ad ilin iselsa n yimaziɣen , ad tili terbaɛt n yiḍebbalen. Am wakken daɣen ara ilin aṭas n yinaẓuren ara d-yecnun. Ar tura, a-t-an llan 6 n yisura. Mačči kan d isura iqbayliyen, meɛna d imaziɣen imi ussan-d ula si Lmerruk. Tura, aql-aɣ nettraǧu, ad aɣ d-rrent kra n tddukkliwin lejwab ɣef utekki-nsent, ad d-adreɣ : tiddukkliwin si Maṣer,si Tunes… Ma yella d iɛeggalen n usenqed, ad naf : Mohend Amaloul ( d aneɣmas deg umaṭṭaf Pluriel ), Kaige Jean simon (d taneɣmast ), Lloyd Sigon ( réalisateur ), Ihlem Ben (cinéaste franco tunisienne ). Yerna-d ɣef waya : ‘’Ad xedmeɣ tiɣri i wid yebɣan ad tekkin di temsizzelt akken ad aɣ-d ceyyɛen izen mebla laɛḍil ( uqbel 12 Yulyu )akken ad asen nexdem ayen ilaqen i wakken ad asen d-rren visa nsen. Ad d-rnuɣ, ad d-iniɣ d akken asensu d wayen akk i d as-d-yezzin d nekni s tddukkla ara t-ixellṣen. Akka, ad nessifsus taswiɛt ɣef yimsizzlen. Nekni, nexdem-d tafaska-agi mebla tikerkas, mebla tixidas, imi netwali imleẓyen xas bɣan ad xeddmen, meɛna aṭas n wid i d asen-yettilin d iɛewwiqen. Ulac win ara sen-ixedmen afud. Ladɣa ssinema amaziɣ, ilaq ad d-iban akken iwata. Ma yella d araz le figuier d’or, yettwaxdem s wuraɣ. Ad d-iniɣ mreḥba i kra n win ara d-yawin axeddim-is ɣer tfaska-agi’’.
Souhila Yamani