D ayen i d-ijebden ddhen n waṭas n medden taggara-a, ama d imezdaɣ n Bgayet neɣ d wid n twilayin tinaragin.
Deg yal aɣilif i sɛan, ala agzam n ubrid i ufan, kra n yimdanen, d asellak akken ad d-rren i tiɣri-nsen yinesdabuyen idiganen, ad asen-d-gen ayen suturen. Ddurt iɛeddan weḥd-s, gar sem d amhad, ugar n 10 n liḥalat n ubelleɛ n yiberdan i d-ibanen. Yal tikkelt deg wanta tamnaḍt. Seg yiberdan-a i iregglen kra n yimezdaɣ, ad d-nebder abrid aɣelnaw wis 9 deg sin n yimeḍqan, Xerraṭa d Suq Letnin. Abrid aɣelnaw wis 26 deg tama n Rmila, akked ubrid aɣelnaw wis 24 deg tɣiwant n At Ksila. Deg tama n Xerraṭa, deg unekcum n ufalu, sutren abeɛda wid igan tigawt n ugzam, ad yenqes uɛeddi n yikamyan iẓayanen. Deg Melbu, ɣef wakken i d-tewwi teɣbalut-nneɣ, qeflen lɣaci abrid ɣef ssebba n wakal i ugin ad yili useqdec-ines akken ur bɣan. Ma yella akkin i Kendira, deg ubrid aɣelnaw wis 75, i d-yezgan gar Kendira d Yiberbacen, d aɣilif n lgaz i yeǧǧan medden n temnaḍt-nni, rran kan i ubelleɛ n ubrid bac ad asen-d-slen yimḍebbren. Ass n ahad tasebḥit, yettwagzem daɣen ubrid aɣelnaw wis 9, gar Suq Letnin d Uweqqas. Ulamma, kra n teswiɛt kan, yuɣal yettwaserreḥ. « Yeskanay-d waya acu i sɛeddayen yimezdaɣ n yal tamnaḍt d uguren. Dɣa, imi ulac akk ayen asen-ilaqen i tudert, ttarran i ugzam n ubrid akken ad iɛeddi wawal-nsen ». I d-yenna yiwen n umezdaɣ n Bgayet. Si tama, aṭas i d-yekkaten deg tigawt-a i yuɣalen d yir tannumi, imi acḥal d aqeddic i ibeṭtlen ɣef ssebba-s, d wacḥal d amuḍin i yewwin takabart ɣef waṭṭan-is, ur yewwiḍ ɣur ṭṭbib-is. Maca si tayeḍ, llan daɣen wid yesseḍlamen inesdabuyen i yesɛuẓẓugen i tsutriwin tigejdanin n yimezdaɣ. M. K.