«Comment optimiser votre ordinateur?» neɣ amek ara (tsenyeffeḍ) tesskeḍ aselkim-ik? D wagi i d azwel i d as-yefka umaru Omar Atmimou i udlis-is. Yeffeɣ-d udlis-a n tsenselkimt (informatique) deg wussan-agi iɛeddan ɣer tezrigin “La pensée” n Tizi Uzzu. D allal ussnan ara yiḥwiǧ yal amdan yesɛan aselkim (ordinateur), ladɣa win iwumi ẓẓay neɣ ur nteddu ara akken iwata lḥal. D adlis n 80 n yisebtar, yettwaru s tutlayt n tefransist. Yettnuzu deg tnedlisin s wazal n 270 Da. Isegzay-d deg-s umeskar, amek i ilaq ad yissin win ara d-yemmagren uguren deg uselkim-ines. D wacu n tarrayin ara yessexdem i wakken ad yerr aselkim-is iteddu akken iwata. Am wakken i t-id-yenna deg tezwer; “Ur teḥwaǧeḍ ara ad tiliḍ d amussnaw deg tsenselkimt i wakken ad teseḥbibreḍ u ad tsegmeḍ aselkim-ik. Ilaq kan, ad tḍefreḍ adlis-agi, yiwet yiwet alamma tessawḍeḍ ɣer ugemmuḍ i tettraǧuḍ”. Ad naf deg wahil n udlis-agi, aṭas n tarrayin swayes yezmer umdan ad iseggem aselkim-is, ama si tama n taẓẓayt, ad t-yerr fessus, ama si tama n tkatit ideg yezmer ad d-isenɣes seg-s amkan. Ad yaf daɣen win ara yesqedcen adlis-a, amek yessizdeg aḍebsi yeqquren (disque dur), timerna n urured n tuqqna n Internet…atg. Ayen ara yesishilen asexdem n udlis-agi, d tugniwin i d-yefka i yal asurif iɣef i ilaq ad iɛeddi fell-as umdan. Yessegzay-d yis-sent iznan n tucḍiwin (messages d’erreur) i d-yettefɣen ɣef ugdil (écran) n uselkim, d wamek i ilaq ad yexdem. Ma ɣef tira n udlis-agi, yenna-d belli: “D agemmu n waṭas n yiseggasen n unadi, d wagi i d asentel n ugerdas-is n magister. D ayen smerseɣ (appliquer) nekk s timmad-iw, yerna wwḍeɣ ɣer ugemmuḍ igerrzen. Ɣer taggara, yessaram ad yesuqqel adlis-agi-ines ɣer tutlayt tamaziɣt, yerna ad yili d abaɣur i tmussni n yal amdan. Ad d-nesmekti kan belli, d wagi i d adlis amezwaru n uselmad-agi n tsenselkimt deg tesdawit n Tizi Uzzu. Omar Atmimou, yettheggi agerdas n Doctorat deg tesdwait Mulud Mɛemmeri n Tizi Uzzu. Yewwi-d yakan agerdas n magister n uzarunay (électronique) deg useggas n 2014 akked win n ujenyur uṭumatik deg useggas n 2009.
A. A.