Accueil Tamazight Taẓrigt tamezwarut n tfaska n tmedyazt timezdit

Tizi Uzzu : Taẓrigt tamezwarut n tfaska n tmedyazt timezdit

712
- PUBLICITÉ -

Thegga-d, ussan iɛeddan, tddukkla tadelsant Taflest, deg Tizi Uzzu, taẓrigt tamezwarut n tmedyazt timezdit s uḥḍar n kra n umḍan n yimedyazen, imi yella yerza ɛaruḍ kra n wid iwumi tehwa tekti. Dɣa, deg lqidar n yiwen n wass kan, ɛeddan-d kra n yimedyazen i d-yewwin isefra akken lwaḥid, ɣef wakken i aɣ-d-tenna tselwayt n tddukkla-a tilemẓit i d-iheggan ttiɛad, Massa Fahima Seddiri. Ɣur kra n yimedyazen, tiwin n yisefra imezdiyen yettak-d i uzayez tamuɣli-nniḍen ɣef uḥulfu d yizen n usefru, imi yal amedyaz s tektiwin-is, s tmenna-s, s taɣect-is, atg. « Tgerrez dayen kan teẓrigt-a tamezwarut, ɣas xussen wallalen ». I d-tenna tselwayt n tddukkla timheggit. Send ad d-ternu, ad d-temmeslay ɣef yiswi n tfaska-a: « Nebɣa s tfaska-a n tmedyazt timezdit tamaynut, ad d-nesnulfu tafaska s wudem-nniḍen. Walaɣ taggara-a imedyazen, wa ijebbed akka, wa akkin. Nniɣ-as yelha ad ten-nezdi, imi asefru imezdi ad t-id-awin ugar n sin n yimedyazen. Ula d arraz n temlilit, ad yili daɣen d imezdi ». S teẓrigt-a tamezwarut, ssaramen yimheggiyen ad yili yenǧer ubrid i teẓrigin-nniḍen, akken ad wennɛent ugar tegnatin, ad temɣur daɣen tfaska. Ɣef tnaga n yiwen n yimekki, akken yebɣu yili, d ayen yelhan wayen i d-tefka teẓrigt-a tamenzut, abeɛda imi wwḍen iswi n uzday.

- PUBLICITÉ -

M. K.

- PUBLICITÉ -