Ulamma nettidir akka tura tagrawla n wuzzal d uplastik, imi teqwa tsutert fell-asen, wanag mazal yesɛa azal-is deg ulzuz ula d asɣar. Abeɛda i useqdec-ines deg kra n yimeḍqan, am d ttawil n uxxam, n yisɣuren, n uɣerbaz, atg. D acu, ugur yellan si tama n usɣar d taɣlayt-ines deg yakk tamiwin anda inuḥ, d wansi i t-id-ttaɣen wid i as-yesran, ama d imsenza neɣ d imsaɣen. Deg tɣiwant n Ayt Smaɛel, i yeggugen s wazal n 60 n yikilumitren ɣer Usamar-anẓul n waɣir n Bgayet, zgan yimezdaɣ d accekti ɣef tuɛert i d-ttmagaren akken ad d-aɣen taɣawsa n usɣar sɣur wat tḥuna i t-ineǧǧren. D ṭṭabla, d ameṭreḥ, d akersi, d ṭṭarmi, neɣ d tamkarḍit, ayen isawem uɣerman, ad t-yaf iɛedda akkin i tzemmar-is tidamsanin, seg wakken ɣlay dayen kan. « Ɣas mazal nesmenyif dduzan n usɣar i uselzem n uxxam-nneɣ, maca a-t-an d ayen ur tezmireḍ ad tqerrbeḍ ɣur wid i ten-ixeddmen. Tasenduqt d tamecṭuḥt i uḥraz n lekwaɣeḍ abeɛda, ad d-tekker s 3000 n yidinaren. Ɣlayet aṭas! ». I d-yenna yiwen n umezdaɣ n Ayt Smaɛel. Seg tama n wat tḥuna n unǧar n usɣar, d yiwet n tririt i d-ttarran merra yal mi ara yesteqsi yiwen ad yefhem ssebba n teɣlayt-a. « D asɣar i yulin di ssuma. Ur nezmir ad t-id-naɣ i wakken ad nexdem s txessart. Ilaq ula d nekni ad nawi lfayda-nneɣ ». D awal n yiwen n uneǧǧar seg Ayt Smaɛel.
M. K.