Accueil Tamazight Tebda tddukkla Amzur, tzerreɛ asirem deg yimezdaɣ n temnaḍt-a

Ayt Smaɛel : Tebda tddukkla Amzur, tzerreɛ asirem deg yimezdaɣ n temnaḍt-a

822
- PUBLICITÉ -

Drus n wakud kan segmi d-tennulfa, tebda tddukkla Amzur n tlawin n Ayt Smaɛel tettekcam deg unnar n leqdic d uheggi-ines. Timeltaɣin (adhérentes) n tddukkla-a tamaynut, banent-d seg tura s wudem i d-yettakken asirem ara yesmeɣren azal n wayen merra grent deg wahil n warmuden i bɣant ad xeddment seg tikkelt ɣer tayeḍ. Ladɣa, segmi yewweḍ yisalli n tlallit-is ɣur yimezdaɣ n temnaḍt, laqant seg tama-nsen ayendin d asebɣes i asent-yernan ugar n lebɣi. Taggara-a ihi, aṭas n wawal i yekkren ɣef tddukkla Amzur d yisenfaren-is, armi dɣa i asent-d-telḥeq i tmeltaɣin-is tennubga sɣur umaṭṭaf Raj (Agraw, Tigawin, Ilemẓiyen) i yellan di Lezzayer tamanaɣt. S wakka, Tusa-asent-d tegnit, ad d-awint awal ɣef tddukkla i d-snernant d yiswan-is. Seld amciwer i d-yellan gar terbaɛt-nni n tlemẓiyin, tettwafren-d tmeltaɣt turmidt Massa Tiziri Idir, ad d-temmeslay i yimsefliden s yisem n tddukkla Amzur akken ad ttettwassen, si tama, ad d-tefk, diɣ, tugna ɣef leqdicat i yetturaǧun sɣur-sent, si tama-nniḍen. Deg teɣzi n tedwilt, tessaweḍ Tiziri Idir, ad tuɣal ɣer deffir ansi i d-tebda ameslay seg tazwara mi asent-d-tusa tekti n usnulfu n tddukkla, amek lḥan lecɣal n unadi n teqcicin ara yekkin deg usenfar, alami d taggara ideg yeḍra lebɣi-nsent, ṭṭfent ttesriḥ dayen. Ur tettu ara Massa Tiziri, ad d-tebder isental n uxxam n tdukkla i qrib ad tefru taluft-is, akked win n tmeṭṭut Tasmaɛlit i twala tebɛed aṭas ɣef unnar n leqdicat yecban win ideg grent. Maca deg wawal-is, tenna-d d akken s ubrid n tdukkla Amzur i tessaram ad yettwabdel waddad-nni ɣer lɛali. Ad d-nesmekti kan d akken taldayt tunsibt n tddukkla Amzur n tlawin n Ayt Smaɛel, ad tili deg wussan i d-iteddun, ideg ara ttwaxedmen waṭas n warmuden yemgaraden.

- PUBLICITÉ -

K. K.

- PUBLICITÉ -