Ini yeffɣen i usaḍuf d yiwet gar tlufa tigejdanin i iḥuzan tuget n tmura n umaḍal, gar-asent Lezzayer. D taluft yettnernin seg useggas ɣer wayeḍ. Akka ara naf dɣa kra n yilmeẓyen i qeḍɛen layas deg tudert deg tmurt-nsen, sseqdacen yiwen yinzi anda i as-qqaren ‘’ Menyaf ad yi-yečč lḥut, wala aweṭṭuf’’. Sdat n waddad n temɛict yenḥafen aṭas deg tmurt n Lezzayer s umata d temḍiqt n Leqbayel, d lexsaṣ meqqren deg yimeḍqan n uxeddim i yelmezyen, imdanen, ass-a, qeḍɛen layas deg tudert deg uwanek deg-i tidiren. Asirem n tuget n yimdanen d inig send ara twenneɛ temɛict. Deg waggur kan iɛddan, ugar n 100 n yilmeẓyen n tɣiwant n Mɛatqa i yeṭṭfen abrid-nsen lewhi n tmurt n Turkit, syin ɣer Gres, d tmurt n Fransa. Amur ameqqran n yiminigen, d ilmeẓyen ur iɛddan ara 25 n yiseggasen deg leɛmer-nsen. Icudd usirem-nsen kan ɣer tmura i irbḥen, anda, i nwan, ad afen yakk ayen i ssaramen, ur tufin ara deg tmurt-nsen. Talut n yinig yefɣen i usaḍuf s imal tetnerni, tgellu-d s yibaxixen meqqren, dɣa amḍan n yiminigen yetmettaten deg lecḍuḍ n yillel agrakal yetnerni seg useggas ɣer wayeḍ. Ɣas ma taluft teṭṭef amḍiq-is, imḍebbren n tmurt-nneɣ mazal-iten ɣelqen allen-nnsen ɣef taluft, ulac yakk lḥir i tifrat n taluft.
Ali Zalouk