Fxmis-agi sdat-nneɣ, 31 maggu 2018, ad tili tmeɣra n ucennay ameqqran i d-tefka temnaḍt n Micli, wagi d Taleb Tahar. Yetturaǧu ad yemlil d yimferǧen-is d wid i t-iḥemmlen deg yirebbi n tmurt iseg i d-yefruri. Ad tili tmeɣra-agi deg wammas adelsan Matoub Lounes n Ain El Hammam, deg temnaḍt n Micli. Yetturaǧu si tmeɣra-a, ad temlil tasa d way turew seg 22h00 n yiḍ d tasawent. Netta si tama-s, yetturaǧu ad asen-d-yexdem taḥawact ara yilin di lxaṭer-nsen. Ɣef wakken i d aɣ-d-yenna: “Ad ɛerḍeɣ ad sferḥeɣ arraw n tmurt-iw, i cedheɣ azal n 15 n yiseggasen-a”. Ikemmel yenna-d: “I lmend n waya, heggaɣ-asen-d tunṭict ara d-ixedmen agzul i umecwar-iw. Ad cnuɣ kra n tezlatin tiqdimin n lqudma, ad cnuɣ diɣ tilemmasin akked tejdidin”. Tameɣra-agi, tettekki deg wahil n waggur n Remḍan, i d-tettheggi yal aseggas Tenmehla n yidles n lwilaya n Tizi Uzzu. Ɣer taggara, yessaram ucennay bu 40 n yiseggasen n ccna, ad tgerrez teswiɛt akken iwata lḥal. I lmend n waya, yenna-d: “Ssarameɣ ad tɛeddi tmeɣra-agi akken i tt-yebɣa wul, imi kulec yettwahegga. Ḍemɛeɣ ad ferḥen yimferǧen s wayen ara asen-d-cnuɣ, nekk daɣen ad ferḥeɣ yis-sen. Imi ssarameɣ ad taččer tzeqqa, wa ad iliɣ d lebɣi-nsen”.
A. A