Aḥric 1u
Amacahu…
Yiwen wass, iteddu Mḥend uccen d ubrid-is, yesterwis deg teẓgi d acu ara yaf ad t-yečč. Cwiṭ am acemma, iwala yiwen yesɣi d warraw-is deg lɛec-nsen, yersen ɣef yixef n ṭṭejṛa. Ihi yerfed aqerru-is, yenna-as i yesγi-nni: « Ad i yi-d-tḍeggreḍ yiwen deg warraw-ik, neɣ ad n-aliɣ ad aken-ččeɣ irkleli. Isɣi-nni, yebda yettergigi : yuggad ɣef warraw-is, maca yegguma ad as-yaɣ awal. Ihi Mḥend uccen, yerra iman-is yerfa, iɛawed yenna-as: « Ay amcum, ad i yi-d-tḍeggereḍ yiwen deg warraw-ik, neɣ ad n-aliɣ, ad aken-ččeɣ akken ma tellam». Ihi yuggad yisɣi-nni γef warraw-is, dɣa iḍegger-as-d yiwen deg-sen. Mi i t-id-yeṭṭef, yerfed-it, yenna-as i yisɣi-nni : « Ur taggad, ad t-awiɣ kan akken ad as-slemdeɣ tiṣurtin n ddin ineslem akked taɛrabt. Azekka-nni, ha-t-an yuɣal-d. Yeqqim ddaw n ṭṭejra yenna-as i yisɣi nni : « Ad i yi-d-tḍeggreḍ yiwen deg warraw-ik, neγ ad n-ali&gamma,; ad aken-ččeγ irkelli ». Xas akken yuggad-it, maca yumen-it, dγa iḍegger-as-d yiwen deg warraw-is. Akken yal abrid mi ara d-yas Mḥend uccen ad as-d-iḍeggeṛ yiwen deg warraw-is, armi i as-d-yeqqim yiwen d aneggaru. Akken d tameddit n wass, yebda yettru, la yettlumu deg yiman-is, yeqqar:
« I tura, amek ara xedmeɣ, azekka ad d-yuɣal Mḥend uccen ad aɣ-yečč irkelli». Cwiṭ am acemma, ha-t-an iεedda-d uwtul n lexla. Akken i t-iwala yettru, yekker yenna-as: « D acu akka i ak-yuɣen a gma isγi, ayen tettruḍ? Isɣi, yeḥka-as-id ayen yeḍran yid s, awtul-nni n lexla imuqel-it yenna-as: « Ay aɛeggun, ay ungif, ikkelex-ik ! Anda akka i teẓriḍ uccen yettalin γef ṭṭejṛa ! Aha tura, sfeḍ imeṭṭawen-ik, ad ak-wessiγ d acu ara as-tiniḍ, azekka mi ara d-yuγal ». Azekka mi ara ak-d-yini « deggeṛ-iyi-d yiwen deg warraw ik, neɣ ad n-aliɣ ad aken-ččeɣ akken ma tellam ! Ini-as: Ali-d ma tzemreḍ ad d-taliḍ . Maca, ṭṭef kan deg wawal-ik.γur-k ad tuggadeḍ »…Tettkemmil
Seg tgemmi n teqbaylit