Tettkemmil tddukkla "Oxy-jeunes" deg tɣiwant n Yiderginen, azal n 45 n yikilumiṭren ɣer Usamar n Bgayet, asemres n wahil-ines i d-thegga i useggas-a n 2018.
Dɣa, i lmend n usenfar « Iderginen Yezdigen », tessuddes-d ussan-a yezrin taẓrigt tis snat n usizdeg d ucebbeḥ deg umkan n 22 n Tnezduɣin, deg tlemmast n Yiderginen. Aqeddic-a n twizi, yella-d s tallelt akked yimsenza d yimezdaɣ n tama-nni. Ad d-nesmekti d akken, seld tigawt-a yelhan, mazal ad d-ḍefrent tiyaḍ, s teqreb, deg tuddar-nniḍen n tɣiwant. S wakka i d-tessekfel tddukkla “Oxy-jeunes“ tiwizi, yiwen seg wansayen yelhan n temɛiwna d tdukkli. Deg teɣzi n wakud i tekka, tella-d tigawt-a n ubraz deg unnecraḥ, tumert d tegmat. Akka, dɣa, ihi tɛedda deg tegnatin igerrzen. Ttwasizdgen yizenqan n urwiḥ, ttwacebbḥent tseddarin (escaliers), ttwaẓẓan ayendin d yijeǧǧigen d ṭṭjur. Am wakken daɣen ttwasersen 6 n yibidunen n yiḥuccan deg lemsaq, i uḍegger n yiguda deg-sen. S umata, yella-d wass s wazal-is i ubaɣur n twennaḍt, d useḥbiber fell-as. Ɣer taggara, tesnemmir tddukkla “Oxy-jeunes“ akk imdanen i yekkin deg ccɣel-a, abeɛda imsenza d yimezdaɣ n temnaḍt-nni i iqedcen seg wul d tayri. Sya ɣer da, tturaǧunt tigawin-nniḍen n tddukkla-a tilemẓit, deg wayyur-a n remḍan. M. K.