Werɛad i d-yekcim unebdu s wudem unsib, yebda yettidir ubrid aɣelnaw wis 9 amxudneq n tkeryas i yesmeḥḥinen inehharen. D ijurriḍen d iɣezfanen n tkeryas d yikamyunen, wa yemmenṭaḍ ɣer wa, teɣzi n waṭas n tmitratin. D ayen i yesɛeṭṭilen tikli, yettaker akud. Liḥala-a, tbeddu-d abeɛda seg umaggar n yiberdan n Bgayet, seg umkan iwumi ssawalen « Katcman ». Meskud ur yekfi ɛad usenfar n usewseɛ n yiberdan-nni, tewɛer ayendin tikli dinna mettwal akuden ideg leḥḥun medden s waṭas. Ladɣa am tnezzayt d meqrub tameddit. Ulamma seg tama n ubrid-a, iteddu wugur srid akken ad yefru. Ɣef wakken i d-wwin kra n yisallen unsiben, ad yamed usenfar n usewseɛ d ureqqeɛ n umaggar n yiberdan n Bgayet, deg wayyur-a n yunyu neɣ n yulyu. « Ɛni d tixennaq i nettidir dinna seg waṭas-aya tura. Ilaq ad serrḥen i yiberdan-nniḍen, akken ad yefru uɣbel-a n yinehharen. Nessaram ur yettɛeṭṭil ara ugar ». D awal n yiwen n unehhar d ilemẓi. Si tama-nniḍen, mačči ala deg unekcum n waɣir n Bgayet i tḥerres cwiṭ tikli. Ɣas ur tebdi tsemhuyt n umerreḥ, maca mxudenqen ḥawla n yiberdan, deg kra n teswiɛin n wass. Ma nebder-d yiwen n umedya, akka ara naf, dɣa, teḥres ayendin, taggara n tmeddit, seg Suq Letnin armi d Lberj n Mira, mi ara uɣalen yimdanen d yixeddamen s ixxamen-nsen. Ulamma ahat mačči s waṭas i yettili uḥras-a, maca iteddu ad yemɣur ugar deg ussan-a i d-iteddun n unebdu. « Ttwaliɣ, yerna akk i waya uɛeṭṭel n lecɣal deg yisenfaren i d-yellan iseggasen-a ineggura di Bgayet. Ttmeslayeɣ tugart ɣef usenfar n usewseɛ n ubrid n Ɛecba n Xerraṭa, akked win n umaggar n yiberdan deg Bgayet. Lemmer ur d-yelli wannect-nni d aɛeṭṭel, ur tettiɣzif lmeḥna-nneɣ armi d tura ». D tamuɣli n yiwen n unehhar-nniḍen seg usamar n Bgayet.
M. K.