Par DDK | 11 Juin 2018 | 474 lecture(s)

Hamidouche (1956-2002)

Ulamma ɛeddan 16 n yiseggasen , maca mazal isem-is yedder

Ass-nni n ttlata 5 yunyu 2018 i zzmen 16 n yiseggasen ɣef wasmi teḥzen tezlit taqbaylit. Tuɣal d tagujilt, imi i tt-yeǧǧa yiwen gar tgejda-s, acu kan yeǧǧa-as-d. Ass-nni n larebɛa mi d-yewweḍ lexbar, teḥzen temnaḍt n Makuda imi yemmut mmi-s i d-trebba acḥal d aseggas. D ilemẓi n 45 n yiseggasen kan d leɛmer, mi medlent wallen-is, yeǧǧa ddunit ur tt-yeṛwi yezger ɣer laxart. Wagi ihi d acennay ameqqran Ḥmiduc.

Ḥmiduc, neɣ s yisem-is n tidet Ḥmed Xeddim (Ahmed khedim), yella d acennay azzayri s tutlayt n teqbaylit. Ilul ass n 14 ɣuct 1956 deg wakud n tegrawla deg Agni n Waklan deg taddart n Ɛeṭṭuc, taɣiwant n Makuda, deg lwilaya n Tizi Uzzu, deg tmurt n Leqbayel. Deg useggas n 1964 i yecna i tikkelt tamezwarut ɣef usayes akked ucennay Racid Meṣbaḥi, dɣa yefka-as afud meqqren akken ad yecnu. Tizlit akk tamezwarut yecna d asefru-nni « A Wiza semmeḥ-as » i yura s timmad-is. Syin akin, yebda asekles n yiḍebsiyen armi yeṣṣaweḍ 8 n yiḍebsiyen. Amezwaru, yecna-t deg useggas n 1980, ma d sin n yineggura, yessuffeɣ-iten-id deg useggas n 1993. Yesɛa yiwe n ṣṣut dayen kan, d win n waqqur. Ulac ilemẓi neɣ tilemẓit ur yessuzen ara. Ḥemmlent akk yilmeẓyen. Yecna gar 1978 armi d 2001, mi yuḍen. Yemmut ass n 5 yunyu 2002, deg temdint n Marseille n tmurt n Fransa, di leɛmer-is ala 45 n yiseggasen. Ma d ssebba n tmettant-is d aṭṭan n tgeẓẓal, i t-yeṭṭfen acḥal d lweqt. Ass n 11 yunyu 2002, wwin-d lǧessa-s s axxam-is yellan deg taddart n Taksebt. Wallant medden i tikkelt taneggarut. Aṭas n yinaẓuren imeqqranen i iḥedren tamḍelt-is, yecban : Lewnis At Mengellat, Baɛziz, Amar u Rabaḥ, Buǧemɛa Agraw…atg. Yettwamḍel deg taddart-is tanaṣlit Agni n Waklan.

Iḍebsiyen-is d tezlatin-ines :
Deg useggas n 1980 : Kkert ay Aytma !
1- A Wiza semmeḥ-as / 2- Ay aḥbib / 3-Mi bdiɣ abrid / 4- Kkert ay aytma ! / 5- Seṭṭac di leɛmer-is / 6- La ttɣaḍen / 7- Lbumba / 8- Nadya ruḥ.

Deg useggas n 1981 : Inna-as Inna-as.
1- Ini-as ini-s / 2- Izem i d-trebba tsedda / 3- Tusa-d listiqlal / 4- Ṣṣber ad ṣebreɣ / 5- Tenɣiḍ-iyi-d / 6- Sawlen-iyi-d / 7- Lḥebs / 8- Fell-am a lalla.

Deg useggas n 1982 : Lemḥiba-w temmut.
1- Lemḥiba-w temmut / 2- Lḥebs / 3- Ṣṣber ad ṣebreɣ / 4- Fell-m a lalla / 5- Tusd listiqlal / 6- Axabit.

Deg useggas n 1983 : Kker a gma ad nruḥ.
1- Kker a gma ad nruḥ / 2- Ay arfiq / 3- Ru ay iẓri-w / 4- Gulleɣ ɣef zzwaǧ / 5- Mmektaɣ-d asmi la ttruɣ / 6- Nniɣ-am a tuzyint ṣṣber.

Deg useggas n 1984 : Sidi Lmir.
1- A tin yettarǧun tafsut / 2- A Sidi Lmir / 3- Fiḥel ma tettruḍ ay ul / 4-Lliɣ yid-m s laman / 5- Tawizet n ṭnac / 6- Ad tkellex, terwi fell-i.

Deg useggas n 1985 : Alger-Tunis.
1- Lexbar ajdid / 2- Asmi akken fudeɣ ddunit / 3- Si Lezzayer ɣer Tunes / 4- Tenna-iyi-d qbel ad truḥeḍ / 5- A Bab yigenwan / 6 Ziɣ Sin Ay tesliḍ.

Deg useggas n 1986 : Targit.
1- Tessefreḥ-iyi targit / 2- Fudeɣ a wi yeswan / 3- Akken kan yeffeɣ Uṛumi / 4- Instrumental / 5- Cbiɣ / 6- Ay Ageffur n meɣres / 6- Tɣaḍ-iyi tuzyint.

Deg useggas n 1988 : Ayayay.
1- Ayayay / 2- Allen-iw deg wallen-is / 3- Igenni / 4- Instrumental / 5- Tamurt / 6- Rwaḥ rwaḥ / 7- Yak tenniḍ-iyi / 8- Akursi.

Deg useggas n 1991 : Le parti.
1- Le parti / 2- Afrux / 3- Mm yimezran / 4- A tin / 5- Lif Lba (Asɛerab) / 6- A Tajeǧǧigt.

Deg useggas n 1993 : Azzayri.
1- L'adresse (Tansa) / 2- Ay ul-iw / 3- Tayri / 4- Acu / 5- Tabani / 6- A mmi-s n udrar / 7- Ayen Ayen / 8- A Baba.

Deg useggas n 1993 : Tafat.
1- Tafat / 2- Ma d kemm / 3- Taɣzalt / 4- Awi-t / 5- Ahya ay arrac / 6- Lḥif / 7-Nekk yid-m / 8- Ay itbir.
Seg wasmi yemmut ar ass-a, aṭas n tejmilin i d as-yuɣalen, ama deg uxxam n yidles Mulud Mɛemmeri ama deg tmurt n Fransa neɣ deg tama n Makuda. Yal tikkelt anwa idis ara as-yerren tajmilt, tikkelt-agi d nnuba-nneɣ. Ulamma tugna-s neɣ udem-is iɣab fell-aɣ, maca mazal ṣṣut-is ḥlawen yezzuzun-aɣ yal tikkelt mi ara as-nsel. Xas iruḥ netta, meɛna yessegra-d deffir-s agerruj ur nfennu, iseg i d-ttagmen yilmeẓyen.
Adaoun Abdelghani

0