Ɣas ma qrib ulac ḥamu deg wakuden-a yezrin, ala tikwal i d-icerreq yiṭṭij aqesḥan, yettenqas cwiṭ usemmiḍ, maca medden ur rran tamsalt d aɣilif. Igeffuren i d-yewwten merra deg wayyuren imezwura n tsemhuyt n tefsut, walan-ten lɣaci d lxir. Ferḥen yis-sen daɣen imi ẓran ad d-yefken abaɣur i ugama d wakal, ladɣa i yimɣan. Acu kan, taggara-a, yiwen ur yebɣi ad d-teɣli ula d tiqqit n waman seg yigenni, imi gren tamawt i temḍerrit i izemren ad tili. Dɣa, ussan-a iɛeddan i yeḍra wayen kukran yimezdaɣ n usamar n Bgayet ad yeḍru, abeɛda ifellaḥen d wid akk iteẓẓun neɣ ikesben ṭṭjur n yigumma deg tferkiwin-nsen. Aya mbeɛd mi yettwaɣ waṭas seg wayen ẓẓan d wayen zerɛen ɣef ssebba n ugeffur, tagut akked usigna i mazal menɛen i yiṭṭij ad d-yefk seg tama-s amur-is n ubaɣur. Addad n tegnawt texreb-as tikli i tennum twennaḍt. Yuɣal ur yettili amek ilaq ad yili deg twula i d-yettawḍen, ttɛeddayent. D ayen yeǧǧan aṭas n leɛtab n medden ad iruḥ ɣef ulac, imi tuget n yimɣan i ẓẓan yewwet-iten waṭṭan. Amedya, deg temnaḍt n Ayt Smaɛel, d tawaɣit i yeḍran deg tebḥirin n yisenfan n lxeḍra, am llubya, tajilbant, ṭumaṭic, atg. Kra seg-sen yewwet-iten lehlak i asen-yesseḥebsen temɣer uqbel ad d-fken lɣella, kra-nniḍen sseɣlin afriwen. Meḥsub ar tura ala drus n yimɣan-nni i yeqqimen war timḍerrit, ttraǧun-ten wid i ten-yeẓẓan ad d-fken xersum cwiṭ n ubaɣur. Ula d asaɣur yettwamegren, ires berra, yuɣ lḥal, yuɣ-itent seg yigeffuren i d-yeɣlin. Aman yemmaren fell-as merra, rran-t berrik armi yerka, ur yezmir ad t-yečč lmal. Ternuḍ-as tiẓurin d uzemmur i tessexser tagut. Seld asḥissef i ten-yeṭṭfen, ggran-d yimezdaɣ n usamar n Bgayet ssaramen kan ad lhun wussan i d-iteddun, ad yeḥmu lḥal akken ur trennu temḍerrit n yimɣan d ṭṭjur.
K.K.