Par DDK | 25 Juin 2018 | 670 lecture(s)

At Dwala

Yettwahegga-d wahil d anesbaɣur i lmend n waya

Ass-agi n letnayen 25 yunyu 2018 i wwḍen 20 n yiseggasen ɣef wasmi yettwanɣa s leɣder ucennay Matoub Lounes, s yifassen yiɛdawen n tudert akken i d asen-isemma deg yiwen gar yisefra-s. Yettwanɣa ass n 25 yunyu 1998 deg Tala Bounan di Beni Douala. Ulamma ɛeddan tura ɛecrin n yiseggasen ɣef tmettant-is, maca mazal ṣṣut-is yettbeɛziq, mazal-t yezdeɣ ulawen d wallaɣen n yimaziɣen anda ma llan deg umaḍal. Dɣa i lmend n usmekti-agi wis 20 ɣef tmenɣiwt-is, yella-d wahil d amerkatni ɣef teɣzi n ssin-agi wussan iɛeddan, ad ikemmel ass-agi alamma d lewhi n 00h00 n yiḍ. Sendiḍelli n ssebt 23 yunyu 2018, deg Uxxam n umezgun Kateb Yacine n Tizi Uzzu, tella-d turart n yiwet tmezgunt taẓawant, yewwin azwel-agi “Ccna i tmagit” neɣ s tefransist “Hymne à l’identité” n temsuffeɣt Lynda Hantour, i texdem d tajmilt i Matoub Lounes akked wid iruḥen d asfel deg umennuɣ ɣef tumast tamaziɣt. Ma d iḍelli n lḥed 24 yunyu 2018, yella-d i uheggi n yimukan n temsikniyin akked useqɛed n wallalen ara yiḥwiǧen deg tmeɣra n wass-a. I wass-agi n letnayen 25 yunyu 2018, ṣṣbeḥ-agi ɣef 08h00, tella-d tulya umḍiq-agi ideg ara d-yili usmekti-agi, yella-d diɣ uqabel n yinebgawen n lḥerma i d-yerzan. Ma ɣef 10h00, ad tili tazla ɣezzifen s ssenf n “Marathon”, yewwin asentel-agi “Abrid n tudert”, ara d-yilin seg umḍiq anda yettwanɣa di Tala Bounan alammi d Taourirt Moussa. Syin ɣur-s ɣef 13h00, ad d-yili ibeddi deg umkan anda yettwanɣa di Tala Bounan. Ma ɣef 14h00, ad d-yili ibeddi-nniḍen ɣef uẓekka-s deg Taourirt Moussa, ad yili diɣ usersi n waṭas n tmeqqunin n yijeǧǧigen ɣef uẓekka-s. Tin ɣur-s, ɣef 17h00, ad tili tmeɣra n ccna iwumi semman “Icennayen imeqqranen icennun Matoub”, gar-asen: Ahcene Ahres, Boudjmaa Agraw, Hocine Berhma, Hamid Matoub(...). Am wakken daɣen ara d-yili uttekki n yicennayen ilmeẓyen i d-yufraren deg temsizzelt “Anza Lounes”. Ɣef 19h00 n tmeddit, ad d-tili lweɛda i wid ara yerzun ɣer din. Ma deg yiḍ, ɣef 20h00, yetturaǧu ad d-ilint tnagiyin n yimawlan-is d yimeddukkal-is. Syin akkin yetturaǧu ad d-tili usenɛet tmeɣra “Le Zenith de Kabylie” s wudem atrar, ideg zemren ad walin wid iḥemmlen Matoub sdat-sen am wakken i tt-yexdem deg useggas n 1995”. Ma ɣef 23h00 n yiḍ, yetturaǧu ad tili tesfugla n taggara s tukci n warrazen d yigerdasen. Ad d-nesmekti kan belli, leqdic-agi adelsan tsuddes-it tesbeddit Lounes Matoub s tallelt n waṭas n yidisan-nniḍen, gar-asen tiddukkliwin tidelsanin n tama-agi, isquma n 4 tɣiwanin n Beni Douala, Asqamu aɣerfan n lwilaya n Tizi Uzzu...atg. Ma d asentel n usmetkti-agi, yella-d akka: “Xellseɣ adrar s yidammen-iw, ad yeqqim later-iw, xas gullen ar d t-sefḍen”, i d-yettwakksen si yiwen gar uɛerqub yeṣfan n yisefra i yekseb.
Ghani Amazigh

0