seg wasmi i d-ilul, ur iḥemmel tamḥeqqranit. Ur iqebbel azaglu. Yeqqar deg wawal-is:’’ Ad narrez wala ad neknu’’ . Akka, dɣa, i llan wussan-is. Amecwar-is meqqar d ayen i yettwarun s yidammen-is. Tizlatin-is, yessenṭaq-d yis-ssent yal amdan: yal tamsalt di tudert, yewwi-d fell-as. Ttawḍen yisefra-is srid ɣer wul . Tamedyazt-is, d timsirin. Si zik yekkat ɣef tutlayt-is, si zik yebɣa ad d-yessebgen idles amaziɣ. Si Muḥend U mḥend, Sliman Azem, Cix Mḥemlmed El Ɛenqa , Cix Arab Buyezgaren, ismawen-a, suzren di Lwennas tayri n ccna, tayri n tẓuri tazedgant. Dɣa seg yimir, i yebda deg umecwar-is. Xas akken leɛmer yekcim ɣer uɣerbaz n uẓawan, maca tamussni-is d ayen ifaze , d ayen i tt-itteqden . Ma yella nuɣal-d ɣer umennuɣ-is, ad t-naf yerza tutlayt d yidles amaziɣ. Iḥemmel-it ugdud amaziɣ di yal amḍiq imi d yiwen urgaz i iteddun ɣef tidet , d win i d-yewwin lewhi ɣer udrar. Yesɛa afud iǧehden swayes yettqabal uccanen i d-itezzin ɣer tama-is. D bab n lfen, d agrawliw. Ur yezmir ḥedd ad t-yenkar. Xas iruḥ, mazal later-is, yal tallit ad t-id-tader.
Asmekti-s sya u sya…
I lmend n usmekti n tmettant n unaẓur, n ugrawliw , n uḥeddad n wawal , tiddukkla ‘’Matoub lounès, mémoire et transmission ‘’ akked tmeṭṭut n unaẓur Mass Nadia Matub, heggan-d yiwet n tejmilt di tmurt n Fransa, anda ccnan aṭas n yicennayen n tezlit taqbaylit. Gar yicennayen i as-yerran tajmilt, ad d-nader gar-asen, Oulahlou , Zedek Mouloud , Malika domrane , Tenna , Ali Amrane, Akli D, Lwiza , Karim OSM , Iggig Moh. Tella-d tameɣra-agi ass-nni n 22 yunyu , di tzeqqa n Bataclan di tmanaɣt n tmurt n Fransa .
Tiddukkla ACBO, tella deg ttiɛad…
Tiddukkla ACBO i yellan di tmurt n fransa , thegga-d ula d nettat tajmilt i unaẓur ass-nni n 24 yunyu 2018 di tzeqqa Dome de Paris , Palais des sport. Aṭas n yinaẓuren i d-yerzan akken ad d-smektin ameqqran n yimeqqranen. Ad nebder gar-asen : Malika Yami, Hacène Ahres , Amaziɣ Kateb , Rachid Mesbaḥi, Hamidou, Karim Yedou , Kamal Buyakoub, AmZik, Lounes Kaci , Kamel Si Amour,Noura Chenane . Akken Yenna-d uselwan n tddukkla : ‘’Uqbel ad yemmet lounes, yenna-as i Mass Baroudi d akken yebɣa ad iɛawed kra si tezlatin-is s wudem-nniḍen. Ihi ass-a, d ayen i yexdem Mass Baroudi ara ssnemreɣ. Azal n 30 n tezlatin i yuttuɛawden «
Tiddukkla Axxam n Dda Ali
Ula d nettat ur tezgil ara asiher-a imi iɛeggalen n tddukkla n Uxxam n Dda Ɛli n tɣiwant n Tizi Rached, heggan-d yiwen wahil i wass-a, 25 deg yunyu 2018, anda ara tili timsikent n tewlafin n unaẓur, asaru n Yusef Lalami « Matoub Lounes , la voie du peuple » , akken daɣen ad ilint tezlatin n unaẓur deg yizenqan n tɣiwant. Deg taggara n wass, ad tili tirza ɣer tmeqbar-is deg Wat Dwala .
Xas ass-a tarwiḥt-ik ulac-itt , ṣṣut-ik
mazal-it yettlal-d deg yidurar i t-id-yessekren. Yettlal-d deg yal aqbayli. Xas ɛeddan yiseggasen, xas yettseggix lǧerḥ yal tikkelt, xas tidet werɛad i d-tban, maca yiwen wass kan ad d-testeqsi , ad d-terr ttar n yal ass iɛeddan war Lwennas .
Yamani Souhila