Seg wass n 14 yunyu ideg nella tura, i tebda, deg tmurt n Rrus, Teqbuct n umaḍal n ddabex n uḍar. Taẓrigt-a aql-itt deg tis 21, kkint deg-s 32 n Tmura. Aṭas n medden i iḥemmlen addal-a, llan ḥaren amek ara walin ttiɛad-a amaḍlan i d-yettuɣalen yal 4 n yiseggasen, imi yiwen n ugraw n tregwa i yesɛan tadrimt, yeṭṭef akk tisura n usiweḍ n temliliyin i waṭas n tamiwin n ddunit. Gar tewtilin timeqqranin i d-yexdem i wid yettafaren addal deg Tefriqt n Ugafa, akken ad teg ttjara ɣef uɛrur-nsen, ilaq fell-asen ad d-aɣen adimu s ssuma ɣlayen, akken ad izmiren ad sɛun tiregwa-s lqidar n useggas. D ayen iwumi ur tessaweḍ teḥrict taẓawalit n tmetti, ur nezmir ad teḍmen xersum tamɛict yelhan. « Ayen i ɣetsen yimḍebbren n tregwa-a, d ayen ur iqebbel wallaɣ. Walan kan amek ara d-skecmen tadrimt, ur walan amek ad ssiwḍen ttiɛad i ddunit. Yak ddabex n uḍar seg waddalen i aɣ-izeddin aṭas ». I d-yenna yiwen n umezdaɣ n Ayt Smaɛel. Maca, ayen i d-yusan yewwi-d abeḥri i turin n lɣaci-a, yekka-d seg tmurt n Telmant (Lalman). Imi yiwen n ugraw n tregwa n tmurt-a, yuɣ izerfan n usiweḍ, yefren ad yesɛeddi timliliyin n teqbuct n umaḍal baṭṭel, seld mi zdint tregwa-a tiɣin n temliliyin ara d-yettilin merra alamma d 15 deg yulyu. Dɣa ad d-nesmekti belli d ayen i d iswi n yiseggasen, akken ad izmiren yiẓawaliyen ad ḍefren baṭṭel ttiɛad-a. Ɣas ma yella tutlayt n uwennet tella-asen cwiṭ d ugur i tegzi, maca tumert n uḍfar n yakk timliyin baṭṭel, tɛedda akk ayen nniḍen. «Ur nudaɣ ɣef wayen i yi-ibeɛden segmi ẓriɣ llant tregwa talmanin i d-yessenɛaten baṭṭel Taqbuct n Umaḍal. Acemma ur t-fehhmeɣ d tidet seg tutlayt talmant, maca tutlayt n ddabex n uḍar nfehhem-itt merra ». I d-yenna yiwen n yilemẓi i iḥemmlen addal-a. Akka ihi i ufan medden asellak ɣur Walmanen, i ixemmen s tmuɣli tamaḍlant.
K.K