Par DDK | 25 Juin 2018 | 684 lecture(s)

Udem gar wudmawen

Awal ɣef uḍebsi aneggaru n Ɛetmani

Seld lɣiba iḍulen ḥawla n yiseggasen, yuɣal-d unaẓur Ɛetmani, ilindi, s uḍebsi n ccna amaynut. Ayendin seg wid i t-iḥemmlen i llan ttraǧun ma d-yernu ad d-yessufeɣ unaẓur-a bu tezlit tamḥaddit neɣ uhu, ladɣa mi ula deg temliliyin d yisiharen n ccna ur d-yettbin taggara-a. Dɣa, mi akken i d-yesres deg ulzuz iseɣrez-a, iwumi yefka azwel “Ay Aqbayli”, d tumert i yeṭṭfen tasga tameqqrant deg wulawen-nsen. Aya, imi udem swayes i d-yuɣal bab n tezlit tamazrayt "Ah ya tawaɣit", yesken-aɣ-d belli ur yebdil ɣef yiseggasen imenza mi yebda akken-nni ccna amḥaddi di temẓi-s. D winna iwumi slan medden deg yiseggasen n 1970, s tezlatin yecban "Ah ya taɣawit", "I Umaziɣ", "A medden slet-d", i d-yeqqlen deg wayyuren-a iɛeddan. Ula d kra n yinaẓuren, gar-asen Ḥasen Aḥres, snagan (cehden) ɣef waya, mi d-yenna i lmend n tejmilt i as-yuɣalen i Ɛetmani deg Yiburayen: « Dda Ḥemmic, d yiwen i yekkin s tehri deg lebni n ufakan n tezlit taqbaylit (…). Ad as-yesseɣzef Rebbi di leɛmer, acku, mi ara nsel i yiseɣrez-ines aneggaru, neḥsa yezmer ad yernu ad d-yefk i tezlit taqbaylit ». Deg uḍebsi-ines, ddant-d snat n tezlatin d tiɣezfanin cwiṭ, "Ay Aqbayli" d "Ay asmi terɛeḍ". Yeqqar deg tezlit tamezwarut: Ay Aqbayli mebla nnekwa, melmi ad d-yas wass ideg ad tt-nesɛut. Ma dduklen Leqbayel ass-a, tutlayt-nneɣ ar d ad tt-narut. S tmaziɣt i cebḥent tira, di tutlayt n medden neɛya, s yidles-nneɣ ad teḍwi tmurt. Akk walan Ɛetmani d bu yimenzayen, i mazal yesnuzgum ar tura ɣef liḥala n yidurar, n tutlayt d yidles. Ma deg tezlit tis snat, yedda-d waya deg tsetna (refrain): Ay asmi terɛeḍ ur tewwit, nruḥ di twaɣit, la nettɛerrib ur nuki. Yeḍra-d leɛǧeb nettwali-t, s lferḥ neqbel-it, smecḥen-aɣ qeḍran s imi. Simmal la nrewwel i tjaddit, a d nnger n ddunit, amek armi nɛemmed i yakk tigi?
M. K.

0