Par DDK | 2 Juillet 2018 | 810 lecture(s)

Igemmaḍ n ukayad n BEM

Tezga-d Tizi Uzzu deg umḍiq amezwaru s 77, 71%

Deg wussan yezrin, i d-bannen yigemmaḍ n ukayad n taggara n uswir n alemmas (BEM) n useggas aɣurbiz 2017-2018. Ɛlaḥsab n tenmehla n usegmi n lwilaya n Tizi Uzzu, azal n 14698 i yejerden iman-nsen deg umuɣen (les listes) n usεeddi n ukayad-a, gar-asen 6850 d arrac akked 7848 d tullas. Lqidar n wid i t-yewwin, yewweḍ aseggas-a ɣer 77, 71%, s wakka i d-tḥella amkan amezwaru deg umyezwar deg wakal aɣelnaw. Leḥsab-agi, yuli s wazal n 10% ɣef useggas iɛeddan, imi ilindi leḥsab yewweḍ ɣer 76, 02 %. Ma D tikkelt tis mrawet d yiwen, ideg ara d-tufrar Tizi Uzzu deg ukayad-agi, ula d win n taggara n uɣerbaz amenzu (5e) d nettat i d tamezwarut. Ma nsedda-d wid iɛeddan ɣer useggas amezwaru n tesnawit s tezmilt n useggas d tin n ukayad-agi, yewweḍ leḥsab ɣer 79,35 %. Ugar n 164 n yiɣerbazen i d-yewwin agemmuḍ yufraren ɣef winna n ugemmuḍ aɣelnaw i yewwḍen ala 56,88 %. Am wakken daɣen i d-wwin 5 n yinelmaden akayad-agi s tezmilt yufraren ɣef 19/20, rnu daɣen 80 n yinelmaden-nniḍen wwin-d ugar n 18/20. Ugar diɣ 426 n yinelmaden wwin-t-id s tenqiḍt yugaren 17/20, ma d 996 wwin-t-id s tezmilt yufraren ɣef 16/20. Ma d wid i d-yeqqimen, wwin-t-id gar 10 alamma d 15/20. Ad nsemekt kan belli, leḥsab n wid i d-yewwin akayad n 5e, yelḥaq ɣer 16642, s lqidar n 98, 07%, ma yella s wid iɛeddan s usuffeɣ (passage) yewweḍ ɣer 99,45%. Ma d leḥsab n wid ur t-d-newwi ara yewweḍ ɣer 327 n yinelmaden. Ma deg wayen yerzan igemmaḍ n ukayad n BAC, tenna-d tneɣlaft n usegmi aɣelnaw massa Nuriya Benɣebriṭ, belli ad bannen ass 22 yulyu 2018.

Amyezwar n 10 n lwilayt timezwura deg ukayad-a

Iberḥ-d tineggura-agi, ddiwan aɣelnaw n yikayaden d temzizliyin (ONEC) s 10 n lwilayat i d-iḥellan imeḍqan imenza n umyezwar deg ukayad n taggara n uswir wis sin (BEM). Asseggas-a, yewweḍ liqdar n wid i t-id-yewwin di 48 n lwilayat n tmurt ɣer 56,88%. D lwilaya n Tizi Uzzu, i yeṭṭfen taqacuct n umḥezwar s lqidar n 88,71%, ma d Sṭif deg umḍiq wis sin s wazal n 85,00%. Ma d amkan wis tlata tewwi-t lwilaya n Mɛeskar s lqidar n 84,99%, deg umḍiq wis rebɛa ad naf Ssuq Hras s wazal n 81,89%. Tipaza deg umḍiq wis xemsa s wazal n 81,79%, deffir-s kan deg umkan wis seta, lwilaya n Bgayet s lqidar n 81,76%. Amḍiq wis sebɛa ḥella-t-id Ǧiǧel s lqidar n 81,40%, ma d Qsenṭina s wazal n 80,51% deg umkan wis tmanya. Amkan wis tesɛa yuɣal i Annaba s lqidar n 80,14%, ma Ɛin Timucent deg umḍiq wis mraw s 79,15%.

A. A

0