Par DDK | 2 Juillet 2018 | 666 lecture(s)

Cwiṭ seg tmucuha n leqbayel

Ḥmiṭuc d Duduc deg teẓgi n ṭṭlam

Aḥric 1u

Tella yiwet teẓgi n ṭṭlam s ddaw taddart n At Weεban, win ara tt-ikecmen deg uzal qayli, ad teccirew yakk ṣṣura-s, ad iḥulfu s ucebbub-is yuli deg yigenni seg rrebrab tessekcam s ulawen. Dda Mira bu yisγaren, tameṭṭut-is Miγisa d warraw-nsen Ḥmiṭuc d Duduc, zedγen deg tlemmast-is. Dda Mira, yettarra-tt ḥala i unegzum n yisγaren, maca amzun ulac d acu yettsami deg-sen. Seg wakken temcubbak akk teẓgi n ṭṭlam, am wakken yal afurk yellan deg-s, yesni γer wayeḍ. Tawacult-agi n Dda Mira bu-yisγaren, d taẓawalit almi d ayen. Iεeggalen-is, ur lḥiqen ara yakk iman-nsen ; ula d aγrum aḥefrur ur teṛwin ara. Yiwen wass gar wussan, akken i d-tewweḍ tmeddit, yeẓẓel dda Mira bu-yisγaren deg teγmert, yeṭṭef aqerruy-is yesnuzgum. Yuγal yenna-as i tmeṭṭut-is: ‘’Amek ara nekkes tura laẓ i warrac-agi? Nekni s timmad-nneγ a-t-a yeṭṭeḍ-itt mmi-s, ur d-yegri kra n weεwin i swayes ara nemmager ussan, xerṣum ad nessebded tigecrar-nneγ”. Terra-as-d awal tmeṭṭut, tenna-as: ‘’Teẓriḍ amek ! Tegra-d kan ad neglu yis-sen azekka s alqaε n teẓgi, ad ten-nessiweḍ ḥala ma d anida ur as-ttafen ara yakk ixef-is i tuγalin. Yal yiwen deg-sen ad as-nekmes tiḥdert n uγrum s afus-is, mi tennesseγfel kan akken ur ttfaqen ara, ad asen-neğğ aḍu γer deffir’’. Dda Mira bu yisγaren: ‘’Ala a tameṭṭut, wagi d yir ttawil, ur zmireγ ara ad sseγreγ tasa-w fell-asen. Amek akka ad n-ğğeγ arraw-iw deg welqaε n teẓgi, nekk ad d-uγaleγ s axxam?’’. Miγisa: ‘’A ziγ kečč d timint ay axessar-iw! Ihi anef-as akka, ad d-terzu tmettant, ad d-taf meqqar d acu ad teddem, ihi ad aγ-terfed deg ukkuẓ (4) yid-neγ γef yiwet tikkelt. Yelha wakka? Yeffeγ fell-ak wayagi?’’. Dda Mira bu yisγaren, yeεfes γef wul-is, iwufeq-itt. Ḥmiṭuc d Duduc seg wakken ur ten-yeğği ara laẓ ad ṭṭsen, slan-d akk i ugejdur-nni yettrağun tiqerray-nsen timeγdurin… tettkemmil
Seg Kabyle.com

0