Par DDK | 2 Juillet 2018 | 689 lecture(s)

At Wagennun

Tifin n yiwen usebdad , 300 n yiseggasen uqbel talallit n Ɛisa?

Ɣef wakken yuzel wawal, ussan-agi kan iɛeddan, nnan-d d akken ufan-d yiwen usebdad amaziɣ i yellan, yakan, 300 n yiseggasen-aya uqbel talallit n Ɛisa.

Tifin-a, tella-d deg taddart Amalu i d-yezgan deg Wat Ɛisa Mimun, tama n Wat Wagennun, lwilaya n Tizi Uzzu. Xas ulamma tettwassen tamnaḍt-agi deg uḥric n trikkisent (archéologie) imi ayendin n yisebdad-nniḍen iqburen akked later n umezruy i d-ufan seg waṭas n tamiwin, yecban Tarihant, Afir, Tigzirt, Ifri,…atg, acu kan,llan wid ur numin ara s tifin-agi taneggarut. Ur uminen ara belli d asebdad i d-izeggren lweqt seg 300 n yiseggasen uqbel talallit n Ɛisa ar tura. Ihi, i wakken ad nwali ugar deg temsalt-agi, nesteqsa Ali Hadjaz imi d netta i d-yessuffɣen isalli, s wudem unsib, ɣer unnar. Ha-t-an wacu i aɣ-d-yenna :’’ Asebdad-agi, yufa-t-id yiwen yilemẓi, Amar Boussad, n taddart Amalu, seg tama n At Ɛisa Mimun, deg Wat Wagennun, deg waggur n unbir 2017. Acu kan, ur as-yefki ara ccan i yuklal. Ur yeẓri ara, ahat, azal i yesɛa usebdad-agi. Ihi, yejmeɛ-it deg uxxam. Yexdem-as kra n ttsawir, syin yessuzer-itent deg Facebook. Ɣas akken, meɛna ulac win yerran ddehn-is d akken d asebdad ajdid i d-yettwafen. Tkemmel teswiɛt armi d yiwen wass, mi d-yewwi uqcic-agi la carte mémoire i wakken ad as-d-yessuffeɣ mmi tteswirat deg usdudyu-inu. Mi yettnadi deg tteswirat, yufa tteswira n usebdad-agi. Yesteqsa-t, yerra-as-d belli dbtifin i t-yufa deg temnaḍt-nni-nsen. Mi yesla mmi i tedyant-a, yenna-as i lukan ad as-iniɣ i baba ɣef wanect-a imi netta yettnadi deg uḥric-agi n umezruy akked yidles ? Ha-t-an amek i yi-d-yewweḍ lexbar n usebdad-agi’’. Syin, ikemmel Ali Hadjaz anadi-ines i wakken ad yegzu ugar s temsalt-a, ladɣa imi yella yakan d amnadi deg uḥric-agi n uẓarmezruy n tama-gi n Wat Wagennun. Iruḥ ɣer win i d-yufan asebdad-a, yebda isteqsiyen ɣef ttbut n usebdad. ‘’Ruḥeɣ, zriɣ-d win uɣur yella usebdad. Aya yella-d deg waggur n maggu iɛeddan, deg Remḍan. Ihi, mi twalaɣ, teṭṭef-iyi tawla, ferḥeɣ dayen kan. Nekk yettnadin deg uḥric-agi i ixedmen asaru Taqbilt ɣef lecɣal-agi, zriɣ azal-is. Acu kan, mazal ttbut ɣef tilin-is ma n tidet neɣ ala. Nwala amussnaw n tsekkisent Mass Kaci Hamdad, s yisem-is d anemhal deg uḥric-agi deg Tigzirt, iwekked-d d akken d asendad aḥeqqani n tallit 300 n yiseggasen uqbel tallalit n Ɛisa. Aya, yenna-t-id s wudem unsib ass-nni n 25 junyu iɛeddan. Yezmer ɛad ad yili d agelli Mass Qba i yettwassnen deg umezruy seg tama-agi n Trihant, taɣiwant n Buǧimaɛ’’. Ma ɣef wayen ara xedmen sya d afella, yenna-d Mass Hadjaz : ‘’Aql-aɣ nessaɛlem tanmehla n yidles n lwilaya n Tizi Uzzu. Nemmeslay yid-sen i wakken ad nwali amek i d laqrar n usebdad-agi’’. Sya ar d-yessali uɣenja ayen yellan deg tasilt, nessaram kan ur d-iɣelli ara usebdad-agi gar yifassen n wid i ten-yessidrigen, neɣ wid i ten-yesnuzun i usalay aberrani.
Hocine Moula

0