Tessufeɣ-d ussan-a tmarut Kaysa Xalifi, i yettarun deg yisebtar-a n Uɣmis n Yimaziɣen, yiwen n wungal s wazal-is s uzwel “Iḥulfan”. Ahat deg wawal-a aneggaru ad yegzu yiwen ɣef wacu isenned, imi ɣef wakken i d-tenna tmarut: ‘’ulac acu yezmer ad yaru walebɛaḍ war aḥulfu neɣ war ma iḥulfa-as, imi tebna ddunit ɣef yiḥulfan. Maca, tamɛayt n wungal-a, tettaǧǧa-yi tikwal ḥebbseɣ tira imi izad deg-s uḥulfu’’. Seg tama n usentel, aṭas n tlufa i tḥuza Kaysa deg termit-is tamenzut deg ssenf-a n tira. Am wakken dɣa i iger tamawt umasdawan Kamal Buɛmara i as-igan tazwart i wungal-a. Tebda-tt-id seg snat n twaculin i tesɛa Yelda, anda deg yal yiwet yella win i tḥemmel ayendin; Mennad deg tmezwarut d Mbarek deg tis snat. Tuɣal ɣer uqeyyem n wazalen n tmiddwa neɣ n tdukkli, dima s yisem n Yelda i d-ibanen d tawudamt tagejdant n wungal seg tama n twetmin. Acku seg tama n yiwetman, ula d imeɣri ad ifiq d Mennad i d asaḍ n teqsiḍt. Yuklal aya dɣa akken ilaq. S waya, ad naweḍ ɣer wayen i d-ibanen d asentel-nniḍen iweqmen n wungal, imi yuzzel aṭas wawal fell-as deg wullis. Tban-d tettwaḥuza Kaysa seg yiwen n wudem n temsirit (racisme) i tettwali deg ddunit-a. Dɣa, yal imeɣri ara iḍillen ɣef tektiwin i d-yellan ɣef tferrawin ticebḥanin, yezmer kan ad yeddu yid-sen. Nnig n tuffirt d ccbaḥa n tira i d-irennun tiẓeḍt n tɣuri, seg tikkelt ɣer tayeḍ tefka Kaysa iḍrisen i waṭas n tlufa-nniḍen; ama d ansayen, d tussna, d tamussni neɣ anecreḥ. Ungal-a, yella tura deg waṭas n tnedlisin. D ayen iɣef ara yili wawal s wudem aseklan ɣer sdat. Taɣuri igerrzen.
M. K.