Par DDK | 2 Juillet 2018 | 625 lecture(s)

Tizi Uzzu Rreḥba tamezwarut n unelmad

“Tɛedda deg tegnatin igerrzen tezrigt-agi”

Assn-nni n lexmis 28 yunyu 2018, i d-tella tesfugla n taggara deg uxxam n umezgun Kateb Yacine, rreḥba tamewazurt n unelmad di Tizi Uzzu. Bdan tasugla-a, s tallilt n Tizi Uzzu, i d-yecnan snat n tezlatin tiqburin, tiɣratin akked lkef xedmen cceɣlen-nsen di tzeqqa. Yella-d deg-s wawal n taggara n Mass Anis Ben Tayeb, aselway n tesqamut n usuddes n leqdic-agi, yenna-d deg wawal-is: “Ad xedmeɣ kan taḥawact tameẓẓyant ɣef leqdic-agi, ttekkint deg-s 7 n lwilayat, llan ugar n 42 n yimsikniyen. Tedda rreḥba-agi ɣef tlata wussan, ideg ahil-nsen yella d anesbaɣur...”. Ikemmel awal-is ɣef tegnatin ideg tɛedda temlilit-agi, yerran tajmilt i unelmad d usdawan, dɣa yenna-d: “Ferḥeɣ aṭas imi tɛedda deg tegnatin igerrzen tezrigt-a tamezwarut, i d-heggan yilmeẓyen i yilmeẓyen, nessaram sya ara qabel ad tuɣal d taɣelnawt”. Yella-d diɣ deg-s ufraq n waṭas n warrazen i yinelmaden, ama d wid i d-yufraren deg leqraya-nsen di tesdawit neɣ wid i d-yufraren deg kra n waddal, fkan-asen daɣen i kra n yimeɛdar i wakken ad ten-sbeɣsen ɣef uxeddim-nsen. Maca uqbel annect-a, llan-d leqdicat-nniḍen ɣef teɣzi n sin wussan d uzgen uqbel tasfugla-agi, i d-yellan ɣef 13h00 n tmeddit. Ass-nni amezwaru n rreḥba-agi, i d-yellan ass-nni n ttlata 26 yunyu 2018, tella-d deg-s tulya tunṣibt n temlilit, syin ɣur-s, llan-d sin n yisaragen ɣef usdawan d wazal-is di tmetti. Ma di tmeddit n wass, ɣef 13h00 d asawen, yella-d beddu n 4 n yisikwan n usileɣ yemxalafen. Tin ɣur-s ɣef 15h30, yella-d umeslay sɣur massa Nabila Goumeziane akked massa Djelti Rabia, i d-yewwin awal ɣef unelmad si tesdawit ɣer wannar n uxeddim. Ma deg wass wis sin, i d-yellan ass-nni n larebɛa 27 yunyu 2018, llan-d 7 n yisikwan n usileɣ i lfayda n yinelmaden ijerden iman-sen. Seg 15h00 alamma 18h00 n tmeddit, yella-d ysarag n mass Amer Meftahi, d yimeddukkal-is, i d-imeslayen ɣef useddu n tkebbanit tameẓyant. Am wakken daɣen i d-tella tikli deg udrar n Redjaouna, i wakken ad seftin yilmeẓyen deg tmerrit n udrar, dɣa d wagi i asentel n tikli-agi. Ma deg tseqqa n ssinima n Tizi Uzzu, tella-d temlilit-askasi akked massa Nadia Labidi, i d-yewwin awal ɣef usefti deg ssinima tazzayrit, akked tirmit-ines daɣen s timmad-is deg uḥric-agi. Ma d ahil n tṣebḥit n wass-nni n lexmis iɛeddan, yella-d deg-s usarag ɣef tirmit i ilaq ad yesɛu yal ilemẓi iteddun ɣer unnar n uxeddim. Ma seg 10h00 alamma d 12h00 n uzal, yella-d ukemmel n 4 n yisikwan-nni n usileɣ i d-yeqqimen deg wahil. D rreḥba n tamniḍant n unelmad, yewwin isem-agi “Afaqukum” neɣ “Asirem” akken i d as-semman nutni s tmaziɣt. Ttekkant deg-s 7 n lwilayat-agi: Tizi Uzzu, Bgayet, Lezzayer Tamaneɣt, Blida...atg. Am wakken daɣen i ttekkan wazal n 42 n yimsikniyen, gar yiɣerbazen ufrinen uzzigen, tisdawiyin, ulmisen n usileɣ d uselmed, tmehliwin...atg. D takebbanit Media “Startub”, i d-isuddsen leqdic-agi ameqqran, s tallelt n tesdawit n Mulud Mɛemmer, tmehla n yidles n Tizi Uzzu, lwilaya n Tizi Uzzu...atg.
Adaoun Abdelghani

0