Deg wussan-agi iɛeddan, i d-yessuffeɣ Mass Ahcene Mariche yiwen wurar i yal amdan imeẓyanen. Yessazreg-itt-id ɣer tezrigin “Art Plume” n Tizi Rached, yettnuzzu s wazal n 200 DA. Iger-d deg-s, 50 n yisteqsiyen, yal asteqsi s usebter-is weḥd-s, ma d tiririyin-nsen, llant deg usebtar daɣen weḥd-s. D timseɛraq neɣ timsefra i yerra s talɣa n yisteqsiyen, i icudden ɣer yidles-nneɣ. Ttawin-d yisteqsiyen-agi awal ɣef 34 n yiɣersiwen, i yettidiren deg umaḍal ideg nettidir. Tuget deg-sen d wid nettwali yal ass, gar-asen, Ayaziḍ, Azger, Taɣaḍt, Tamcict, Tizizwit…atg. Yal asteqsi, ibeddu s tneflit-agi: “Anwa i d-as-yennan”, syin akkin ad tt-id-yeḍfer usteqsi-nni s ddaw-s kan. Ula d tiwerqin-nni, iɣef ttwarun ccebḥent aṭas imi sɛant rrqem yesɛan assaɣ d tudert n umdan amaziɣ. Tabewaḍt ideg i d-ddant, llant deg-s 51 n tewriqin, yeččuren d tamussni akked sser. D urar ara d-yawin abaɣur i yal win ara t-yesɛun, zemren ad t-uraren sin medden. Yiwen ad isteqsay, dɣa ma yufa-d tiririt rrbeḥ a tafat, ma ulac ad as-yefk winna-nniḍen tiririt iwatan. D urar i yezmer ad yurar umeqqran neɣ umeẓyan, ur yettwaxdam ara kan i usɛeddi n lweqt, maca d win n tmussni d usnerni n tzemmar n umdan. Ad d-nesmekti belli, Mass Ahcene Mariche, ilul ass n 21 deg wayyur n Furar 1967, di taddart n Tala Tulmut i d-yezgan d tɣiwant n Tizi Rached. D aselmad n Tɣarant neɣ Tsengama (la physique) u d aselmad n tesnalkimt (infortatique), yesɣer deg uɣerbaz alemmas (C E M) Metrak Omar, deg tɣiwant n Tizi Rached. Deg uḥric n tẓuri, yeqdec deg waṭas yiḥricen yemgarden n lfen, xas ma yebda s tira n yisefra d tmedyazt u mazal-t deg-s ar ass-a. Maca yurar yakkan deg yisura n tmaziɣt amedya :asaru n « Wardiya n Ṭriz » d usaru « Ineẓra mazal ad nẓer »…atg. D amedyaz diɣ, seg useggas n 1984 imir yesɛa 17 n yiseggasen kan di leɛmer-is. Deg tefsut n 2005, i d-yesuffeɣ ammud n yisefra-ines amezwaru, imir yella yeqqar di tesdawit n » l’Oregin State » di tmurt n Marikan. Yeffka-as azwel » Iḍ Yukin » neɣ « Les Nuit Volubiles », ideg id-llan 23 n yisefra. Seg yimir ar ass-a, ɣur-s ugar n 14 n wammuden tmedyazt s rrebɛa n tutlayin-agi; tamaziɣt, taɛrabt, tafransist akked teglizit. Gar wayen yura ad d-nebder: Taԑezzult-iw, Iḍ Yukin, Tidderray, Contusions, La Toupie et L’échelle…atg.
Ghani Amazigh