Par DDK | 9 Juillet 2018 | 1051 lecture(s)

Iderginen

Yella-d uḥanu n usileɣ i yilmeẓyen

Thegga-d tddukkla "Oxy-jeunes" n tɣiwant n Yiderginen, ass n 30 yunyu iɛeddan, kra n yiḥuna (ateliers) n usileɣ i lfayda n yilemẓiyen i yeṭṭafaren amussu asdukklan. Deg wazal n 20 yid-sen, yal yiwen seg wanta tamnaḍt i d-yusa, ḥeḍren yilemẓiyen-a i kraḍ n yiḥuna n usileɣ, akken, tugart tugart, ad sgerrzen aswir-nsen deg usefrek, daɣen ad issinen ad d-ttakken i tddukkla ideg qeddcen ugar n wayen i d-fkan yakan. Ama d wid n Yijermunen, Ayt Smaɛel, Tasexriwt, Ticci, Bgayet neɣ n Yiderginen, akk-nsen ɛewwlen ad d-zzin i ṭṭabla n ulmad i lmend n ttiɛad-a. S umata, yella-d wawal deg yiḥuna-a ɣef teywalt, ama daxel neɣ berra tddukkla, ɣef usefrek d ferru n yimcubbaken i d-yettilin, akked tddukkli deg umussu asdukklan akked tmetti. Ɣef tnaga n yiɛeggalen n tddukkla timheggit "Oxy-jeunes", sefraḥent ayendin tikkin n yisegbaren (acteurs) d yimeltaɣen n tddukkliwin deg uḥanu, deg yiwet n tegnit n umbaddal n tektiwin d unecraḥ. Yewwi-d, ad d-nesmekti belli, mi d-muggen dayen kraḍ n yiḥuna-a, yeḍfer-iten-id uskasi s wazal-is ɣef umaḍal n tddukkla. Ula d taselwayt n tdayra n Yiderginen akked unemhal n CSP llan dinna gar wiyaḍ-nniḍen. Seld tigawt-a, ɣef wakken i d-tewwi teɣbalut-nneɣ i iqerben i tddukkla "Oxy-jeunes", ayendin i d-yesnagan s uqeddic igerrzen i d-tessuddes tddukkla-a tilemẓit n Yiderginen. Am wakken llan wid i d-izeɣnen s wudem yelhan, fkan-d rray-nsen i useggem n kra n tlufa i icudden i uheggi s umata. Mi tɛedda tigawt akken ilaq, tesnemmir tddukkla akk ilemẓiyen i d-yerran i tiɣri, merra wid i d-yusan d inebgawen, d wid yekkin deg uheggi d usenɛet n yiḥuna.

M. K.

0