Par DDK | 9 Juillet 2018 | 967 lecture(s)

Gen di talwit a Kaysa !

Tettru tmaziɣt, teḥzen teqbaylit. Ayen i aɣ-iruhen ass n 25 yunyu 2018, ɣlay di ssuma. S tazzla teǧǧiḍ-aɣ a Kaysa. Truḥeḍ deg wass ur necbi wiyaḍ, ass-nni amcum, ass-nni afuḥan, ideg tensa tcemmaɛt n usirem, texsi tafat n tebɣest, tessusem taḍsa-m i lebda. Terniḍ i umaḍal n Dda Lwennas, win i tḥemmleḍ aṭas, deg umilli n tmettant-is. Tura, yal mi ara nruḥ ad d-nemmekti tamettant n yitri-a n teqbaylit, ad kem-id-nemmekti ula d kemm. Anemgal daɣen ad yeḍru. Tkemmleḍ ula d kemm ɣer yidisan-is, yal yiwen deg-wen tiktiwin-is, deg wul taqbaylit, timmeɣnest, tamagit, tajaddit d tnaslit. Yal yiwen deg-wen, yemmut mebla lebɣi, yal yiwen deg-wen, tettwaɛdem-as temẓi. Tettwaɣeḍrem di sin, netta acengu-is, d amdan, ma d kemm acengu-im, d aṭṭan. Di sin yid-wen tḥemmlem tudert, tumert, talwit akked tayri. Tezgam txeddmem fell-asent. Ur awen-d-yettunefk ara waṭas n wakud d tidet, teǧǧam-aɣ zik. Meɛna akken yeqqar wawal: « Yella walebɛaḍ, yella ulac-it. Yella walebɛaḍ, ulac-it yella». Am kemm, am netta, tellam tellam, d tafekka-nwen kan i iruḥen. Teǧǧam-aɣ, meεna teǧǧam-aɣ-d ayen ur nkeffu, ur nfennu. Ayen icudden ɣer yidles-nneɣ, ɣer tutlayt-nneɣ d wansayen-nneɣ. D agerruj ara yeqqimen i lebda. Idles-nneɣ, fell-awen d anagi. Ass-a, azekka ad tilim gar-aneɣ d iḥeddaden n wawal. Teǧǧam-aɣ-d ayen yebnan ɣef wawal. Tamettant-im a Kaysa, ur nebmi fell-as, armi mazal ur numin. Ad teqqimeḍ i lebda gar-aneɣ, deg ulawen-nneɣ, deg wallaɣen-nneɣ. Ahat agectum-im (tafekka) yeǧǧa-aɣ, meɛna kemm, iḥulfan-im, tigzi-m, taḍsa-m, tayri-m mazal-iten. Sgunfu di talwit a talwit, amḍiq-im gar yitran a titrit, tafat-im d lmuḥal ad tens, d awezɣi ad texsi. Ḥemmleɣ-kem a Kaysa, ḥemmleɣ-kem a uletma n Tasa, ḥemmleɣ-kem i lebda.
K. K.

0