Aḥric wis 2
Iḍ-nni yettak anzi s ass seg wakken i d-tessufeγ tziri tuccar-ines. Ayyur-is i d-yessaknen udem-is akken yessefk yerra iẓra-nni yettiṛṛiqen amzun ssemγin-d allen n teẓrureq. Yelqeḍ-d aṭas seg yiẓra-nni, ibubb-d almi yugi ad yeddem, yuγal s axxam, yenna-as i Duduc: ‘’Ɣas ur ttḥebbir i kra a uletma, llan iεessasen d At yigenwan yid-neγ’’. Yemdel allen-is, din din yeṭṭeṣ. Azekka-nni, ngum ur ğğin yitran igenni mi akken i ten-id-tessker Miγisa seg yiḍes, tenna-asen: ‘’Ass-a yessefk ad nessegmeḍ isurrifen-nne&gamma,; ad nerzut γef ulqaε n teẓgi akken ad d-nezdem isγaren’’. Tuγal teddem-d aḥric n yiwet teḥdert n uγrum, tebḍa-asen-tt deg sin, tenna-asen: ‘’Axet-n akin, ṭṭfet tura aγrum-agi, d ayagi kan i yellan, maca, mačči tura ara t-teččem, ar deqqal!’’. Tuγal tezwar sdat-sen, nutni ḍeffren-tt. Duduc terra tiḥedrin-nni n uγrum deg snat s aqelmun-is, acku Ḥmiṭuc ulac akk γur-s kra n umḍiq anida ara yeddem amur-is, iεebba i yiman-is iẓra-nni i d-yelqeḍ deg yiḍ almi ur yezmir ad yeddem kra-nniḍen. Lḥan akken ddeqs n yisurrifen, Ḥmiṭuc yezga yessegray aḍar γer deffir, yerra iman-is yessikid s axxam. Akken iger baba-s tamawt γef wayen, iεeggeḍ fell-as, yenna-as: ‘’Ḥmiṭuc, acuγer akka tessikideḍ kra yekka wass γer deffir?’’. Ḥmiṭuc: ‘’Nnaγ a ba, d amcic-iw acebḥan kan i ssikide&gamma,; a-t-an yuli γef lqermud, yeqqar-iy-id s tfettusin-is awi yid-k talwit a Ḥmiṭuc’’. Miγisa: ‘’D nnεi-k d lberdeε-ik, wahin mačči d amcic-ik amellal, d iṭij i d-yewwten s aḥelyiw almi yuγal yettfeğğiğ akkahin’’. Ḥmiṭuc daγen mačči d amcic i iwala, d iẓra-nni i d-yewwi yid-s i yesrus deg ubrid γef tγerγert s lexmata wa deffir wayeḍ. Akken wwḍen γer yiwen uxenduq deg tlemmast n ulqaε n teẓgi n ṭṭlam, yenna-asen dda Mira bu yisγaren i warraw-is: ‘’Ahaw tura ẓewret γef yiman-nwen, awit-aγ-d isγaren γer dagi, ad nessiγ yis-sen times akken ur ken-igezzem ara usemmiḍ-agi yekkaten s aqerru! Ḥmiṭuc d Duduc ufgen am lebraq, din din ssulin tirect n yisγaren n maras annect n tqubbet. Ssaγen times yessekren ajajiḥ yekkaten ad imassi igenni.
tettkemmil
Seg Kabyle.com