Ad tili, aseggas-agi, tezrigt tis mrawet d semmuset (15) n lfeṭṭa n Ath Yenni , seg 26 yulyu alamma d ass n 3 ɣuct 2018. Azal n 150 n yiḥeddaden n lefṭṭa i yetturaǧun ad d-seknen i medden, di tmeɣra-agi, ayen heggan ɣef teɣzi n useggas. Tuget n yiḥeddaden n lfeṭṭa ara yilin di usiher-agi, ad ilin n tama n Wat Yanni, maca ad ilin daɣen wid n tamiwin-nnḍen n tmurt n Leqbayel. Tameɣra-agi n lfeṭṭa, d ttiɛad adelsan imi i d-yettili deg-s leqdic anesbaɣur. D armud adamsan daɣen, imi yettak tagnit i yinḍan (artisans) i wakken ad senzen sselɛa-nsen. Ma d iswi-ines, ɣef wakken i d-nnan yimsuddsen, d aseḥbiber d usnerni n yirmad n ufus n tmurt n Leqbayel, d uselmed n yilmeẓyen i wakken ad ṭṭfen deg lḥiraft-agi ur negrent ara. Yetturaǧu daɣen, ad ilin yisaragen yemxalafen ara d-sekren yimussnawen d yimnadiyen deg uḥric-agi n tinḍi. Ad farsen yimsuddsen n tmeɣra-agi tilin n Tuddsa (UNESCO), i wakken ad ssutren deg-sen asekcem n lfeṭṭa n At Yanni ɣer tgemmi tamaḍlant. Annect-agi, dayen i d-yenna, ussan-agi iɛeddan, uselway n tɣiwant n At Yanni, Mass Deghoul Smail. D tagnit daɣen i yinḍan d yimsuddsen n leqdic-agi, i wakken ad ssutren deg wid terza temsalt-a, yecban aɣlif n tmerrit akked yirmad iqburen, akken ad d-lhun s yiɣillifen i d-ttmagaren yiḥeddaden-agi. Ulamma yella lexṣaṣ deg lfeṭṭa akked yisufar imenza i sexdamen yinḍan-agi d leɣla-nsen di ssuq n berra, maca mazal ttkemmilen axeddim. Acu kan annect-agi, ur yeffiɣ ara fell-asen, imi ɣlayet lfeṭṭa ur tettnuzu ara s waṭas. Daya i yeǧǧan kra-nniḍen ad ǧǧen lḥirfa-agi i d-lemden ɣer lejdud-nsen, imi ɣef leḥsab-nsen ur tseččay ara aɣrum di tizi n wass-a, sdat n leɣla n temɛict. Ihi, ilit di ttiɛad gar 26 yulyu alamma d 3 ɣuct 2018.
Ghani Amazigh