Par DDK | 16 Juillet 2018 | 850 lecture(s)

Taḥawact sya u sya

Timlilit tagraɣlant ɣef tussnalmudt

Ad d-yssuddes Wammas aɣelnaw n tsegmisent (pédagogique) d tesnilest i uselmed n tamziɣt (CNPLET), s tallelt n tesdawit n Paris 8 akked tin n Cergy-pontoise, timlilit tagraɣlant ɣef uselmed n tutlayt n tmaziɣt di tmurt n Lezzayer. Ad d-yili wannect-agi, ussan n 28 akked 29 unbir i d-iteddun, dagi di tmurt n Lezzayer. Ma d asentel i fernen yimsuddsen-agi i temlilit-a, d wa “Deg ubrid n tussnalmudt n tutlayin tiyemmatin: d acu-tent temmerwiyin ɣef uselmed n tmaziɣt d usenerni-ines”. D timlilit ara d-yesddukklen imussnawen-imuzzag, iselmaden, imnadiyen deg tmussniwin n tutlayin, ara d-yerzun seg tesdawiyin n tmurt n Lezzayer akked tesdawiyin n tmura tiberraniyin. Ad d-tawi temlilit-agi ɣef waṭas n temsal, yecban, aselmed n tmaziɣt i yimdanen iɛerbawalen s tussnalmud tamazzagt, tiwsatin n tussnalmudin swayes yezmer yiwen ad iselmed tamaziɣt...atg.

Tawennaḍt: Arraz aɣelnaw i temdint zegzawen

Ihegga-d Uɣlif n twennaḍt d waffuden idummen, tazrigt tamenzut n warraz aɣelnaw n temdint tazegzawt, ara d-yilin s lmendad n uselway n tegduda Mass
Abdelaziz Bouteflika. Ad yettunefk warraz-agi ass n 25 tuber 2018, i lmend wass aɣelnaw n useklu, i d-yettilin yal 25 tuber n yal aseggas. D timsizzelt i yellin
tiwurra-s i merra timdint n tmurt n Lezzayer, acu kan ilaq ad kesbent tiweltin (condition) n uttekki, yerna ilaq ad qaddrent ilugan n ufran, ara ad d-yefk uɛeggal n teseqqamut n ufran n warraz-agi aɣelnaw n temdint tazegzawt. Ad d-yili ujerred n temdinin yebɣan ad ttekkint deg temsizzelt-agi, gar 31 ɣuct alamma d 25 cutember 2018. Ma d asrusi n zzmamat n uttekki, ad d-yili deg Uxxam n uɣlif n twennaḍt d waffuden idummen di Lezzayer tamanaɣt.

Adlis amezwaru n tmaziɣt s braille

Yesnulfa-d Useqqamu unnig n timmuzɣa, yiwen n ttawil n tɣuri s tmaziɣt i yimdanen ur nettwali ara. D adlis amezwaru i d-yeffɣen s ttawil n braille, i wakken ad slemden yis-s tutlayt n tmaziɣt i wid iwumi i d-tt-tekkes tmuɣli. Yeffeɣ-d ussan iɛeddan, s lemɛawna n Tiddukka taɣelnawt i uselmed, i uxeddim akked temsetla d yimdanen iderɣalen (ANEESA). Ɣef wakken i t-id-yenna umaray amatu n Useqqamu unnig n timmuzɣa, Mass Si El Hachemi Assad, d allal i useḥmel d tukci n tegnit i wid ur nettwali ara i wakken ad lemden tutlayt n tyemmat-nsen.
A. A.

0