Par DDK | 16 Juillet 2018 | 1002 lecture(s)

Ajdid deg tira

Taqbaylit deg usenfar Common Voice

Tesker-d tkebbanit Mozilla, deg yulyu 2017, yiwen n usenfar d ameqqran n uɛqal aɣectan (reconnaissance vocale), iwumi tsemma « Common Voice ». Ma yella, deg tazwara, ala kra n tutlayin i ikecmen deg-s, acu kan deg wagguren-agi inerggura aṭas i d-yernan n tutlayin, gar-asent, dɣa, tutlayt taqbaylit. Ad d-nesmekti belli iswi n usenfar ɣer Mozilla d aheggi n taffa n yisefka n taɣect i uzayez s umata, akken ad t-tallel deg usnulfu d usihel n yisnasen neɣ n yiqeddicen n taɣect. Aya, yettuneḥsab d asurif ageɛmir i tger tutlayt taqbaylit deg umaḍal n Internet, imi tella deg-s. Yebḍa usenfar ɣef waṭas n yiḥricen, am usekcem n tefyar, taɣuri-nsent, d uwekked-nsent ma seḥḥant neɣ uhu. Imi yeldi i medden merra, yal yiwen yezmer ad d-yessumer tifyar, ad yessekles neɣ ad ibuṭi, ad d-yili ɣer taggara usiffi deg uɣerbal. Ayen icudden i usekles n taɣect, yewwi-d ɣef yal yiwen ad d-yenṭeq tifyar akken iwulem lḥal. Mebla ma yettu, ilaq ad yili deg tegnit n war lḥes d lhul, akken ad yezdig uklas-ines. D asenfar s wazal-is ara d-yawin ayendin d abaɣur i tutlayin d yiɣerfan, imi ar tura, ala 46 n tutlayin i ikecmen deg-s. Deg yiẓeḍwan inmettiyen Facebook d VK, yezga yessawal-d Muḥend Belqasem, agensas n usenfar-a deg Mozilla si tama taqbaylit, i wid akk izemren ad d-fken afus i usnerni n usenfar-a, ama s tikci n tefyar neɣ s usekles n taɣect-nsen. Aṭas i d-yerran i tiɣri, rnu mazal yettsemmid uqeddic alamma yewweḍ ukurpus, s tɣara yelhan, ɣer wazal 10 000 n yisragen n umeslaw. Mi ara d-ttwagemrent tukkisin n tuɣac n yimdanen, armi temɣur taffa n yisefka, yezmer yal yiwen ad ten-yesseqdec deg yal asenfar n taɣect i d-yettheggi, amedya asnas n ulmad n teqbaylit. Seg yiswan n usenfar-a Common Voice daɣen, d aɛiwen n tegzi tamacinant deg umeslay d umsefham akked walsiyen. S waya, tebɣa daɣen tkebbanit Mozilla ad tefk tagnit i yakk tutlayin i wakken ad sɛunt amḍiq deg internet, ulamma akka tura drus seg-sent i yerza usenfar.
M. K.

0