Par DDK | 23 Juillet 2018 | 670 lecture(s)

Bechloul

Aseɛlem ɣef twaɣiwin n usucef deg yibaraǧen

Imḍebbren n ubaraǧ n Tilesdit bdan, taggara n yimalas yezrin, yiwet n lḥemla n useɛlem ɣef lemḍerra i as-d-igellu usucef deg yibaraǧen d tmedwin anda aṭas n terwiḥin i yettruḥun. Ɣef waya, yakk ttawilat ilaqen ttwaheggan-d i wakken ad yaweḍ yisalli alamma d tudrin ibeɛden maḍi deg temnaḍin n ddayra n Bechloul. Ɣef tkerrust yettezzin, ama deg temdinin neɣ deg tudrin tettwaɛelleq nezmer ad d-nɣer : « Asucef deg yibaraǧen yessawaḍ ɣer lmut : Hadret ! » Am wakken daɣ ttwaferqent kra n tewriqin anda i d-ssegzin yimḍebbren tixeṣṣarin i d-yettilin yal aseggas. Dɣa da i d-smektan belli aman n ubaraǧ mgaraden d wid n lebḥer imi imezwura d wid i izemren ad cebbken amdan deg lqaɛa, rnu ur as-ttaǧǧan ara tagnit i wakken ad d-yifrir imi d wid fessusen s waṭas. Deg ubrid-nsen, imḍebbren n Tilesdit ur ɣfilen ara deg usmekti n yimdanen d akken yal anebdu ddeqs n terwiḥin i yettruḥun deg yimukan-a ur nesɛi ttawilat wala lɛessa, imi zgan ttilin d tifexxet i yilmeẓyen. Ɣef waya, awal-nsen iressa ɣef tikti anda abaraǧ d win i d-yettakken aman i tissit d tfellapht ur yezmir ad yili d amekkan i usucef.

M. Smail

0