I lmend n taggara n useggas aɣurbiz 2017-2018, thegga-d tddukkla tinmettit i yimeɛḍar d yimuḍan idumen Tiɣri, ddurt iɛeddan, yiwet n tuffɣa n uḥewwes i ubaɣur n warrac n tneɣrit tuzzigt, ɣer umazzer n Kefrida, deg tɣiwant n Tsexriwt. D ass ideg llan yiɛeggalen n tddukkla-a i lmendad n yigruden, ad ttfacin seg ḥamu n unebdu, ad zmummgen sdat yiracucen n umazzer. Ad d-nesmekti belli tewwi-ten tddukkla Tiɣri, deg wayen iɛeddan, ula ɣer usagen n unnar n Zzyama, akked ufrag n unnecraḥ, deg Jijel. Yal mi ara d-tas tegnit nnig wahil, ur tt-zegglen wid ibedden fell-asen akken ad asen-beddlen amaḍal, ɣas ulamma i usrag neɣ sin. Akka i d-tusa tirza-a n ubbuḥri d tukksa ɣef lxaṭer deg unebdu-a, seld aqeddic yelhan, teɣzi n useggas, sɣur terbaɛt n yiselmaden d yiɛeggalen n tddukkla Tiɣri. Imi ilaq ad d-nini tewwi-d ar tura agemmuḍ yessecrah taneɣrit tuzzigt ideg llan warrac-a imuḍan, meskud ilindi ssawḍen ad jerrden sin n warrac deg uɣerbaz unsib. Aseggas-a daɣen, ɣef wawal n uselway n tddukkla, teddun ad gren deg uɣerbaz anelmad-nniḍen, deg tuɣalin tiɣurbizin 2018-2019. Seg temhelt-a i iɛeddan akken iwata, snemmiren yiɛeggalen n tddukkla akk wid yekkin deg-s, ama seg tɣiwant n Ayt Smaɛel neɣ n berra, armi acemma ur ixus. Aya, imi gren-d deg tigawt kra n medden i yefkan azal i twizi, ttḥulfun deg wanida tlaq temsetlelt, akken ad ilin din. « D ayen yelhan wahilen-a n unnecraḥ i d-yettwaheggayen, seg tikkelt ɣer tayeḍ, i warrac imecṭaḥ. Ula d aqeddic n tddukkla Tiɣri, d yilemẓiyen merra i as-d-yezzin, yuklal ayendin d asebɣes. Nekk si tama-w, ad ten-snemmreɣ s tussda ». D awal n yiwen n ubabat seg Ayt Smaɛel.
M. K.