Par DDK | 23 Juillet 2018 | 811 lecture(s)

Ad d-tili temlilit n yiṛemmasen (Ansej-Angem-Cnac) ass n 26 deg yulyu

Ad yili deg ussan i d-iteddun ttiεad ara d-yessemlalen Iṛemmasen i d-yewwin asmad (crédit) seg Ansej, Angem, akk d Cnac. Ddeqs seg wid i d-yeffɣen si tesdawit s igerdasen, acu kan ur ufin ara axeddim, yerna taswiεt mačči d tin yezmer ad iqabel yiwen s yiɣimi. Γef waya, aṭas deg-sen i as-yennan ahat tifrat ma yella xedmeɣ i yiman-iw. Ledɣa imi imḍebber n uwanek, akken i d yenna, yerra azal meqqer i terbaεt n yilmeẓyen i d-iteffɣen si tesdawit. Yefka-sen tagnit I wakken ad xedmen, ad d-ssufɣen tazmert d tfasa-nsen (énergie ) ɣef wayen ara d-yawin abaɣur i tdamsa n tmurt. D ayen mi i iserreḥ i terbaεt-agi bac ad refden iman-nsen s yismaden ibankanen. Ihi yal yiwen ad yeldi takebbanit-is deg leqdic as-yehwan, yal wa deg wacu yeẓwer. Meεna, akken qqaren ‘’tirga mxalfa’’. Targit d usirem-nsen ffɣent akken-nniḍen. Aṭas n yiεewwiqen i d-muggren. Si yiwet n tama, sεan lebɣi ad xedmen, si tayeḍ, ufan-d iman-nsen di lexṣas ageεmir di ttawilat. D ayen i ten-yeǧǧan ttcektayen seg waddad-agi i ttidiren. «Am win iwumu fkan aɣrum, netta meskin ur yesεi ara uglan. Fkan-aɣ-d axeddim, kksen-aɣ wid ukud ara nexdem. Ansi ara d-awiɣ sselεa? Iwumi ara senzeɣ? Yiwen ur d-yeddi yid-neɣ». I d-yenna yiwen seg wid i d-yessuffɣen tarmiṣt s ttawil n Ansej. Ilemẓiyen-agi, tḍaq fell-asen teswiεt, anezgum d ttexmam yeṭṭafar-iten. Dɣa tiddukkla CAME n Tizi Uzzu tesla-d i taɣect n yinesmalen-agi (promoteurs), imi nettat tqeddec ɣef yizerfan-nsen. Daymi i d-terra i usiwel-nsen, yerna tessumer-d anejmuε ameqqran n yiṛemmasen sdat n tneggiwin(Agences) n Ansej, Cnac akked Angem. Ihi ttiεad-nsen ad yili ass n 26 di yulyu i d-iteddun i wakken ad mmeslayen ɣef wayen i ten-iceɣben, ad ssiwḍen akken ma llan i tifrat n lεali.

K.K.

0